បរទេស៖ ក្រសួងការពារជាតិអាមេរិកមិនជឿថា ការវាយប្រហារនុយក្លេអ៊ែរ របស់រុស្សីនឹងកើតមាននោះទេ មន្ត្រីមន្ទីរបញ្ចកោណជាច្រើនបានប្រាប់អ្នកកាសែត ក្នុងសប្តាហ៍នេះបែបនេះ។ ពួកគេបានបន្ថែមថា រដ្ឋាភិបាលក្រុងវ៉ាស៊ីនតោន នៅតែចាត់ទុកការគំរាមកំហែងយ៉ាងធ្ងន់ធ្ងររបស់ទីក្រុងម៉ូស្គូ។
យោងតាមសារព័ត៌មាន RT ចេញផ្សាយនៅថ្ងៃទី៨ ខែតុលា ឆ្នាំ២០២២ បានឱ្យដឹងថា លេខាធិការព័ត៌មានរបស់មន្ទីរបញ្ចកោណ លោកឧត្តមសេនីយទោ Patrick Ryder បានប្រាប់អ្នកសារព័ត៌មាន ក្នុងសន្និសីទសារព័ត៌មានមួយ កាលពីថ្ងៃព្រហស្បតិ៍ថា “យើងមិនវាយតម្លៃថា លោកប្រធានាធិបតី ពូទីន បានធ្វើការសម្រេចចិត្តក្នុងការប្រើប្រាស់ អាវុធនុយក្លេអ៊ែរនៅពេលនេះនៅហទេ” ។ លោកបាននិយាយបន្ទាប់ពី ប្រធានាធិបតីអាមេរិកលោក Joe Biden បានព្រមានថាហានិភ័យ នៃជម្លោះនុយក្លេអ៊ែរគឺស្ថិតនៅក្នុងកម្រិតខ្ពស់បំផុតចាប់តាំងពីវិបត្តិមីស៊ីលគុយបាឆ្នាំ ១៩៦២ ។
លោក Ryder បាននិយាយថា សម្រាប់ពេលនេះ សហរដ្ឋអាមេរិក មិនមានព័ត៌មានណាមួយ ដែលនឹងធានាការផ្លាស់ប្តូរនៅក្នុង “ជំហររារាំងជាយុទ្ធសាស្ត្រ” របស់ខ្លួនឡើយ ដោយបន្ថែមថា ទីក្រុងវ៉ាស៊ីនតោននឹងបន្តតាមដាន យ៉ាងដិតដល់នូវស្ថានភាពនេះ ព្រោះវាយកការគំរាមកំហែងយ៉ាងធ្ងន់ធ្ងរបស់រុស្ស៊ី។
កាលពីថ្ងៃសុក្រ អ្នកនាំពាក្យ មន្ទីរបញ្ចកោណម្នាក់ទៀតគឺលោក J. Todd Breasseale បានប្រាប់សារព័ត៌មាន Politico ថា សហរដ្ឋអាមេរិក នៅតែមិនឃើញមានការបង្ហាញណាមួយ ដែលថារុស្ស៊ីកំពុងរៀបចំ សម្រាប់ការវាយប្រហារនុយក្លេអ៊ែរ។ លោកបាននិយាយថា “ដើម្បីឱ្យច្បាស់៖ យើងមិនបានឃើញហេតុផលណាមួយ ដើម្បីកែសម្រួលឥរិយាបថនុយក្លេអ៊ែរ ជាយុទ្ធសាស្ត្រផ្ទាល់ខ្លួនរបស់យើង ហើយក៏មិនមានការចង្អុលបង្ហាញថារុស្ស៊ី កំពុងរៀបចំដើម្បីប្រើប្រាស់ អាវុធនុយក្លេអ៊ែរជាបន្ទាន់និះដែរ” ៕ ប្រែសម្រួលៈ ណៃ តុលា
