ស្ដុកហូម៖ នាយករដ្ឋមន្ត្រីប្រទេស ស៊ុយអែតលោកស្រី Magdalena Andersson បានឲ្យដឹងថា ប្រទេសស៊ុយអែត នឹងមិនចែករំលែកការរកឃើញ នៃការស៊ើបអង្កេតកន្លែងឧក្រិដ្ឋកម្ម ជាមួយរុស្ស៊ីបន្ទាប់ពីការបំផ្ទុះ ដែលបានបំផ្លាញបំពង់ឧស្ម័ន Nord Stream កាលពីពីរសប្តាហ៍មុននោះទេ។
ទូរទស្សន៍ស៊ុយអែត (SVT) បានដកស្រង់សម្តីលោកស្រី Andersson ដែលឆ្លើយតបទៅនឹង សំណើរបស់រុស្ស៊ីថា “នៅក្នុងប្រទេសស៊ុយអែត យើងមានការសម្ងាត់មុនការសាកល្បង។ យើងកំពុងធ្វើការយ៉ាងពិតប្រាកដអំពីរបៀប ដែលយើងបង្កើតចម្លើយរបស់យើង” ។
លោកស្រី Andersson បានប្រាប់អ្នកកាសែត នៅលើកប៉ាល់របស់ ឆ្មាំឆ្នេរសមុទ្រស៊ុយអែត នៅក្នុងកំពង់ផែ Karlskrona មិនឆ្ងាយពីកន្លែងលេចធ្លាយថា “នេះគឺជាព្រឹត្តិការណ៍ពិសេសមួយ” ។
កាលពីសប្តាហ៍មុន ឆ្មាំឆ្នេរសមុទ្របានបិទ តំបន់ជុំវិញការលេចធ្លាយពីរ សម្រាប់ការស៊ើបអង្កេតកន្លែងឧក្រិដ្ឋកម្ម ហើយកងទ័ពជើងទឹកបានបញ្ជូន យ៉ាងហោចណាស់នាវាមួយ ដែលអាចធ្វើការស៊ើបអង្កេតក្រោមទឹក។
ការលេចធ្លាយចំនួន ៤កន្លែង ក្នុងនោះ ២កន្លែងនៅក្នុងតំបន់សេដ្ឋកិច្ចផ្តាច់មុខ របស់ប្រទេសស៊ុយអែត (EEZ) និងពីរទៀតនៅក្នុងតំបន់ EEZ របស់ប្រទេសដាណឺម៉ាក បានកើតឡើងក្នុងចម្ងាយខ្លី ពីគ្នាទៅវិញទៅមក និងក្នុងរយៈពេលដ៏ខ្លី ដែលបង្កឱ្យមានការសង្ស័យ នៃការបំផ្លិចបំផ្លាញ។
ការវិភាគអំពីសកម្មភាពរញ្ជួយដី នៅក្នុងតំបន់ក៏បានបង្ហាញ ពីហត្ថលេខារញ្ជួយដី ដែលត្រូវគ្នាទៅនឹងការផ្ទុះផងដែរ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។ កាលពីថ្ងៃព្រហស្បតិ៍ សេវាសម្ងាត់ស៊ុយអែត បានឲ្យដឹងថា ការស៊ើបអង្កេតបានពង្រឹង ការសង្ស័យថា វាជាអំពើបំផ្លិចបំផ្លាញយ៉ាងធ្ងន់ធ្ងរ ៕
ប្រែសម្រួល ឈូក បូរ៉ា
