តម្លៃប្រេងធ្លាក់ចុះ ខណៈដែលអង្គការ OPEC កាត់បន្ថយការព្យាករណ៍ សម្រាប់កំណើនតម្រូវការ

ញូវយ៉ក៖ តម្លៃប្រេងបានធ្លាក់ចុះ កាលពីថ្ងៃពុធ បន្ទាប់ពីអង្គការនៃប្រទេសនាំចេញប្រេង (OPEC) បានទម្លាក់ការប៉ាន់ស្មាន កំណើនតម្រូវការប្រេងពិភពលោក សម្រាប់ទាំងឆ្នាំ២០២២ និងឆ្នាំ២០២៣ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។

West Texas Intermediate សម្រាប់ការចែកចាយខែវិច្ឆិកាបានធ្លាក់ចុះ ២,០៨ដុល្លារអាមេរិក ឬ ២,៣ភាគរយ មកនៅត្រឹម ៨៧,២៧ ដុល្លារក្នុងមួយបារ៉ែល នៅលើផ្សារហ៊ុន New York Mercantile Exchange។

ប្រេងឆៅប្រភេទ Brent សម្រាប់ការចែកចាយ នៅខែធ្នូបានធ្លាក់ចុះ ១,៨៤ដុល្លារ ឬ ២ភាគរយ មកនៅតម្លៃ ៩២,៤៥ដុល្លារក្នុងមួយបារ៉ែលនៅលើផ្សារហ៊ុន London ICE Futures Exchange ។

នៅក្នុងរបាយការណ៍ប្រចាំខែ ដែលត្រូវបានឃ្លាំមើល យ៉ាងដិតដល់របស់ខ្លួន ដែលបានចេញផ្សាយកាលពីថ្ងៃពុធ អង្គការ OPEC បានកាត់បន្ថយការប៉ាន់ស្មានរបស់ខ្លួន សម្រាប់កំណើននៃតម្រូវការប្រេងពិភពលោក ដោយលើកឡើងពីទស្សនវិស័យមិនច្បាស់លាស់ កាន់តែខ្លាំងឡើងសម្រាប់សេដ្ឋកិច្ចពិភពលោក។

អង្គការ OPEC បានព្យាករណ៍ថា តម្រូវការប្រេងនឹងកើនឡើង ២,៦៤លានបារ៉ែលក្នុងមួយថ្ងៃ ក្នុងឆ្នាំនេះ ធ្លាក់ចុះចំនួន ៤៦០០០០បារ៉ែលក្នុងមួយថ្ងៃ ពីការព្យាករណ៍ខែកញ្ញារបស់ខ្លួន។ កំណើននៅឆ្នាំ២០២៣ ក៏ត្រូវបានកែសម្រួលធ្លាក់ចុះផងដែរ។

ពាណិជ្ជករបានរង់ចាំទិន្នន័យ ស្តីពីស្តុកប្រេងឥន្ធនៈ របស់សហរដ្ឋអាមេរិក ខណៈដែលរដ្ឋបាលព័ត៌មានថាមពល របស់សហរដ្ឋអាមេរិក គ្រោងនឹងចេញផ្សាយរបាយការណ៍ ស្ថានភាពប្រេងឥន្ធនៈប្រចាំសប្តាហ៍របស់ខ្លួន នៅថ្ងៃព្រហស្បតិ៍នេះ។

អ្នកវិភាគដែលត្រូវបានស្ទង់មតិដោយ S&P Global Commodity Insights រំពឹងថាការផ្គត់ផ្គង់ប្រេងឆៅរបស់សហរដ្ឋអាមេរិក នឹងបង្ហាញពីការកើនឡើងចំនួន ២,២លានបារ៉ែលក្នុងអំឡុងសប្តាហ៍ ដែលបញ្ចប់នៅថ្ងៃទី០៧ ខែតុលា៕ ប្រែសម្រួល ឈូក បូរ៉ា