បរទេស៖ អភិបាលខេត្ត Vyacheslav Gladkov បានអះអាងកាលពីថ្ងៃសៅរ៍ថា ឃ្លាំងស្តុកប្រេង និងប៉ុស្តិ៍ត្រួតពិនិត្យព្រំដែនមួយកន្លែង ត្រូវបានរងការបាញ់ផ្លោងនៅក្នុងតំបន់ Belgorod ភាគខាងត្បូង នៃប្រទេសរុស្ស៊ី។
ឧបទ្ទវហេតុនេះកើតឡើងមួយថ្ងៃបន្ទាប់ពីមីស៊ីល បានវាយប្រហារស្ថានីយថាមពលមួយកន្លែង ក្នុងទីក្រុង Belgorod បណ្តាលឲ្យមានការឆាបឆេះ យ៉ាងសន្ធោសន្ធៅនៅកន្លែងនោះ។
យោងតាមសារព័ត៌មាន RT ចេញផ្សាយនៅថ្ងៃទី១៥ ខែត្លា ឆ្នាំ២០២២ បានឱ្យដឹងដោយផ្អែកតាមការលើកឡើងរបស់លោក Gladkov ដែលសរសេរនៅលើប៉ុស្តិ៍ Telegram របស់លោកថា “យើងមានគ្រាប់ផ្លោងមួយទៀត ហើយថា ក្រោយមកគ្រាប់ផ្លោងធ្លាក់ត្រូវដេប៉ូប្រេង ហើយ ភ្លើងដែលកើតឡើង បន្ទាប់ពីការវាយប្រហារត្រូវបានពន្លត់។ គ្មានអ្នកស្លាប់ត្រូវបានគេរាយការណ៍ឡើយ។
លោកបន្តថា គ្រាប់ផ្លោងចំនួន ១៤ គ្រាប់ ត្រូវបានបាញ់នៅការិយាល័យគយក្នុងទីក្រុងព្រំដែន Shebekino ដោយបន្ថែមថាគ្មាននរណាម្នាក់ រងរបួសនោះទេ។
មន្ត្រីរុស្ស៊ីបានចោទប្រកាន់ទីក្រុងគៀវ ពីបទវាយប្រហារស្ថានីយថាមពល នៅទីក្រុង Belgorod កាលពីថ្ងៃសុក្រ ដោយបានបង្អាក់ការផ្គត់ផ្គង់អគ្គិសនីមួយ រយៈពេលខ្លី និងការបាញ់ផ្លោងជាន់ខាងលើ នៃប្លុកផ្ទះល្វែងកម្ពស់ ១៦ ជាន់ក្នុងទីក្រុងកាលពីថ្ងៃព្រហស្បតិ៍ ប៉ុន្តែ មិនមានអ្នករងរបួសទេ៕ ប្រែសម្រួលៈ ណៃ តុលា
Recommended for you
