គៀវ៖ ខណៈដែលអ៊ុយក្រែន ដណ្តើមយកទឹកដី ដ៏ធំរបស់ប្រទេសពីរុស្ស៊ី មកវិញ ក្រសួងរដ្ឋាភិបាលមួយ បានឲ្យដឹងថា ខ្លួនបានរកឃើញសាកសព ជនស៊ីវិល និងទាហានជិត មួយពាន់នាក់ ដែលប្រហែលពាក់កណ្តាល ត្រូវបានរកឃើញ នៅក្នុងផ្នូរដ៏ធំមួយ។
ក្រសួងការធ្វើសមាហរណកម្ម នៃដែនដីកាន់កាប់បណ្ដោះអាសន្ន របស់អ៊ុយក្រែន បានរាយការណ៍ពីការរកឃើញនេះ កាលពីថ្ងៃពុធក្នុងសេចក្តីថ្លែងការណ៍មួយ ដោយផ្តល់ព័ត៌មានបន្ថែម អំពីឧក្រិដ្ឋកម្មសង្គ្រាមរុស្ស៊ី ដែលគេចោទប្រកាន់។
របាយការណ៍នេះកើតឡើង ប្រហែលមួយខែបន្ទាប់ ពីមន្ត្រីអ៊ុយក្រែន បានប្រកាសយ៉ាងរីករាយ ថាការវាយលុកមួយ បានទទួលជោគជ័យ ក្នុងការរុញកងកម្លាំងរុស្ស៊ី ចេញពីតំបន់ភាគឦសាន និងភាគខាងត្បូង នៃប្រទេសអ៊ុយក្រែន។
កងកម្លាំងអ៊ុយក្រែន បានដណ្តើមយក បានជាង ៦០០០គីឡូម៉ែត្រការ៉េ (២៣១៦ម៉ាយការ៉េ) ពីប្រទេសរុស្ស៊ីតាំងពីដើមខែកញ្ញាមក។ ប្រជាជនអ៊ុយក្រែន នៅក្នុងតំបន់ទាំងនេះ បានទទួលរងនូវការរំលោភសិទ្ធិមនុស្ស ក្រោមការកាន់កាប់ របស់កងកម្លាំងរុស្ស៊ី ហើយអ្នកស្រុកជាច្រើន នៅតែបាត់ខ្លួន។
ក្រសួងបានឲ្យដឹងថា ស្នងការសម្រាប់មនុស្សបាត់ខ្លួន Oleh Kotenko កំពុងធ្វើការនៅក្នុងទឹកដីដែលបានទាមទារមកវិញថ្មីៗនេះរបស់ប្រទេសអ៊ុយក្រែន ជាមួយភ្នាក់ងារអនុវត្តច្បាប់ក្នុងស្រុក និងក្រុមស្វែងរក។
សាកសពបុគ្គលិកយោធា និងជនស៊ីវិល ប្រហែលមួយពាន់នាក់ ត្រូវបានបញ្ចុះ រួមមានកុមារ ហើយក្រសួងបានរាយការណ៍ថា ៤៥០ ត្រូវបានគេរកឃើញនៅក្នុងផ្នូរដ៏ធំមួយក្នុងទីក្រុង Izium ដែលជាទីក្រុងសំខាន់យុទ្ធសាស្ត្រ នៅក្នុងតំបន់ Kharkiv ភាគឦសានរបស់ប្រទេសអ៊ុយក្រែន ដែលត្រូវបានរំដោះ ក្នុងអំឡុងពេលការវាយលុក៕
ប្រែសម្រួល ឈូក បូរ៉ា
