ចិន​ព្រមាន​អាមេរិក​ កុំ​ឲ្យ​បង្ហាញ​ព័ត៌មាន​លម្អិត ​នៃ​កិច្ចចរចា​រវាងប្រធានាធិបតីចិន Xi Jinping និងប្រធានាធិបតី Joe Biden ជាមួយកោះតៃវ៉ាន់

បរទេស៖ រដ្ឋាភិបាលចិនបានជំរុញមន្ត្រីអាមេរិក ឱ្យប្រឆាំងនឹងការចែករំលែក ព័ត៌មានលម្អិតជាមួយកោះតៃវ៉ាន់ អំពីកិច្ចប្រជុំនាពេលខាងមុខ រវាងប្រធានាធិបតីចិន Xi Jinping និងប្រធានាធិបតីអាមេរិក Joe Biden ដោយនិយាយថា ទង្វើបែបនេះនឹងជាការ រំលោភលើពិធីការការទូត និងកិច្ចព្រមព្រៀងទ្វេភាគី រវាងប្រទេសទាំងពីរ។

យោងតាមសារព័ត៌មាន RT ចេញផ្សាយនៅថ្ងៃទី១២ ខែវិច្ឆិកា ឆ្នាំ២០២២ បានឱ្យដឹងថា នៅពេលសួរអំពីការអត្ថាធិប្បាយថ្មីៗ ដោយទីប្រឹក្សាសន្តិសុខជាតិអាមេរិកលោក Jake Sullivan ដែលបាននិយាយថា ទីក្រុងវ៉ាស៊ីនតោននឹងបង្ហាញ ព័ត៌មានលម្អិតនៃកិច្ចប្រជុំថ្នាក់កំពូល នៅសប្តាហ៍ក្រោយទៅកាន់ទីក្រុងតៃប៉ិនោះ អ្នកនាំពាក្យក្រសួងការបរទេសចិនលោក Zhao Lijian បានផ្តល់ការឆ្លើយតបយ៉ាងធ្ងន់ធ្ងរ។

លោកបាននិយាយកាលពីថ្ងៃសុក្រ ដោយសំដៅទៅលើកិច្ចព្រមព្រៀង ជាបន្តបន្ទាប់រវាងទីក្រុងវ៉ាស៊ីនតោន និងទីក្រុងប៉េកាំងថា “អ្វីដែលអាមេរិកបាននិយាយអំពី ការសង្ខេបកោះតៃវ៉ាន់ស្តីពី ជំនួបរវាងប្រមុខរដ្ឋចិន និងប្រមុខរដ្ឋអាមេរិកបានបំពាន យ៉ាងធ្ងន់ធ្ងរលើគោលការណ៍ចិនតែមួយ និងបទប្បញ្ញត្តិនៃសេចក្តីថ្លែងការណ៍រួម ចិន-អាមេរិកចំនួនបី។ នេះ​ជា​រឿង​ដ៏​ធ្ងន់ធ្ងរ ហើយ​ចិន​បដិសេធ​យ៉ាង​ម៉ឺងម៉ាត់ ​ចំពោះ​រឿង​នេះ» ៕

សម្រួលៈ ណៃ តុលា