ឡុងដ៌៖ អង់គ្លេសជឿថា សកម្មភាពរបស់អ៊ីរ៉ង់ និងរុស្ស៊ី កំពុងបង្កការគំរាមកំហែង ដល់សន្តិសុខនៃមជ្ឈិមបូព៌ា រដ្ឋមន្ត្រីការបរទេសចក្រភពអង់គ្លេស លោក James Cleverly ដែលប្រាប់ទៅកាន់វេទិកាសន្តិសុខ ក្នុងតំបន់នៅប្រទេសបារ៉ែន ។
ទីក្រុងតេអេរ៉ង់ បានទទួលស្គាល់ថា ខ្លួនបានផ្គត់ផ្គង់ដល់ទីក្រុងមូស្គូ ជាមួយនឹងយន្តហោះដ្រូន ប៉ុន្តែបានលើកឡើងថា ពួកគេត្រូវបានបញ្ជូនមុនពេល ដែលសង្រ្គាមនៅអ៊ុយក្រែន បានចាប់ផ្តើមនៅក្នុងខែកុម្ភៈ។
សហរដ្ឋអាមេរិកបានឲ្យដឹងថា រុស្ស៊ីបានប្រើយន្តហោះដ្រូន ដែលទិញពីប្រទេសអ៊ីរ៉ង់ ដើម្បីវាយប្រហារទីក្រុង និងហេដ្ឋារចនាសម្ព័ន្ធថាមពល នៅអ៊ុយក្រែន នេះបើយោងតាមការចុះផ្សាយរបស់ទីភ្នាក់ងារសារព័ត៌មាន The National។
អ៊ីរ៉ង់ក៏ត្រូវបានគេចោទប្រកាន់ ពីការវាយប្រហារផ្សេងៗ លើការដឹកជញ្ជូន និងការផ្គត់ផ្គង់សព្វាវុធដល់ក្រុមជីវពល ចាប់ពីក្រុម Hezbollah ក្នុងប្រទេសលីបង់ដល់ក្រុមឧទ្ទាម Houthi ក្នុងប្រទេសយេម៉ែន។
លោក Cleverly នឹងឲ្យដឹងនៅក្នុងសុន្ទរកថា “អាវុធដែលផ្គត់ផ្គង់ដោយអ៊ីរ៉ង់ គំរាមកំហែងដល់តំបន់ទាំងមូល។ សព្វថ្ងៃនេះ កម្មវិធីនុយក្លេអ៊ែររបស់អ៊ីរ៉ង់ មានភាពជឿនលឿនជាងពេលមុនៗ ហើយរបបនេះបានងាក ទៅលក់ឲ្យរុស្ស៊ី នូវយន្តហោះដ្រូនប្រដាប់អាវុធ ដែលកំពុងសម្លាប់ជនស៊ីវិល ក្នុងប្រទេសអ៊ុយក្រែន”៕
ប្រែសម្រួល ឈូក បូរ៉ា
