ហ្សាកាតា៖ មន្ត្រីម្នាក់បានឲ្យដឹងថា ចំនួនអ្នកស្លាប់ដោយសារ គ្រោះរញ្ជួយដីកម្រិត ៥,៦ រ៉ិចទ័រ ដែលបានវាយប្រហារខេត្ត West Java របស់ឥណ្ឌូនេស៊ី បានកើនឡើងដល់ ៣១០នាក់ ហើយមនុស្ស ២៤នាក់ផ្សេងទៀត នៅតែបាត់ខ្លួននៅឡើយ។
ប្រធានទីភ្នាក់ងារគ្រប់គ្រង គ្រោះមហន្តរាយជាតិលោក Suharyanto បានប្រាប់សន្និសីទសារព័ត៌មានមួយថា “ប្រតិបត្តិការរុករក ដែលធ្វើឡើងដោយអ្នកជួយសង្គ្រោះ បានរកឃើញសាកសពបន្ថែមទៀត កាលពីថ្ងៃសុក្រ ដែលនាំឱ្យចំនួនអ្នកស្លាប់កើនឡើងដល់ ៣១០នាក់” ។
លោកបានបន្តថា ការវាយតម្លៃហានិភ័យនៃផលប៉ះពាល់ នៃការរញ្ជួយដីកំពុងដំណើរការ។ ជំនួយនឹងត្រូវបានចែកចាយបន្ត ទៅអ្នកនៅរស់រានមានជីវិត នៅក្នុងមជ្ឈមណ្ឌលជម្លៀសនៅទូទាំងស្រុក Cianjur ដែលជាតំបន់មួយ ដែលរងគ្រោះខ្លាំងជាងគេ។
លោក Suharyanto បានបន្ដថា អគារសិក្សាសរុបចំនួន ៣៦៣ អគារសាសនា ១៤៤ អគារការិយាល័យចំនួន ១៦ និងកន្លែងសុខភាពចំនួន ៣ ត្រូវបានបំផ្លាញដោយការរញ្ជួយដីនេះ ។
កាលពីថ្ងៃព្រហស្បតិ៍ ទីភ្នាក់ងារបានរាយការណ៍ថា ការរញ្ជួយដីបានបំផ្លាញផ្ទះសម្បែងចំនួន ៥៦,៣១១ខ្នង និងបានជម្លៀសអ្នកស្រុកចំនួន ៦២,៥៤៥នាក់ នៅក្នុងស្រុក Cianjur ខេត្ដ West Java របស់ប្រទេសឥណ្ឌូនេស៊ី ៕
ប្រែសម្រួល ឈូក បូរ៉ា
