វ៉ាស៊ីនតោន ៖ ប្រធានាធិបតីសហរដ្ឋអាមេរិក លោក ចូ បៃដិន និងសមភាគីបារាំងលោក អេម៉ានុយអែល ម៉ាក្រុង បានយល់ព្រមបន្តគាំទ្រ ការការពាររបស់អ៊ុយក្រែន ប្រឆាំងនឹងការឈ្លានពាន របស់រុស្ស៊ី ខណៈដែលបញ្ជាក់ពីសារៈសំខាន់ នៃការរក្សាសន្តិភាព លើកោះតៃវ៉ាន់ ដែលជាកោះប្រជាធិបតេយ្យស្វ័យគ្រប់គ្រង ដែលប្រឈមនឹងសម្ពាធ ពីប្រទេសចិន ដែលអះអាងកាន់តែខ្លាំងឡើង ។
នៅក្នុងសេចក្តីថ្លែងការណ៍រួមមួយ ដែលបានចេញផ្សាយ បន្ទាប់ពីកិច្ចប្រជុំ របស់ពួកគេ នៅទីក្រុងវ៉ាស៊ីនតោន មេដឹកនាំទាំងពីរ ក៏បានថ្កោលទោស យ៉ាងដាច់អហង្ការ ចំពោះការសាកល្បងកាំជ្រួច របស់កូរ៉េខាងជើង ដោយលើកឡើងថា ពួកគេបង្ក “ការគំរាមកំហែង” ដល់តំបន់។
លោក បៃដិន កំពុងធ្វើជាម្ចាស់ផ្ទះលោក ម៉ាក្រុង សម្រាប់ដំណើរទស្សនកិច្ចផ្លូវរដ្ឋលើកដំបូង ដោយមេដឹកនាំបរទេស ក្រោមការគ្រប់គ្រងរបស់លោក ហើយបន្ទាប់ពីមានជម្លោះ ការទូតកាលពីឆ្នាំមុន លើកិច្ចព្រមព្រៀង រវាងសហរដ្ឋអាមេរិក អូស្ត្រាលី និងអង់គ្លេស ដែលនឹងជួយទីក្រុងកង់បេរ៉ា ទទួលបាននាវាមុជទឹកដើរដោយថាមពល នុយក្លេអ៊ែរជំនួសឱ្យនាវាម៉ាស៊ូត ពីប្រទេសបារាំង ។
ជាក់ស្តែង មេដឹកនាំទាំងពីរបានស្វែង រកការបង្ហាញភាពរឹងមាំនៃទំនាក់ទំនងទ្វេភាគី ដោយលោក បៃដិន បានហៅប្រទេសបារាំងថា ជា “សម្ព័ន្ធមិត្តចាស់ជាងគេ” របស់សហរដ្ឋអាមេរិក និង “ដៃគូដែលមិនផ្លាស់ប្តូរ ក្នុងបុព្វហេតុសេរីភាព” ក្នុងអំឡុងពេលពិធី មកដល់នៅសេតវិមាន។
នៅក្នុងសេចក្តីថ្លែងការណ៍រួម សម្ព័ន្ធមិត្តទាំងពីរនៃអង្គការសន្ធិសញ្ញាអាត្លង់ទិកខាងជើង បានសន្យាផ្តល់ជំនួយផ្នែក សន្តិសុខ មនុស្សធម៌ និងសេដ្ឋកិច្ចដល់អ៊ុយក្រែន “ដរាបណាវាត្រូវការ” រួមទាំងការបង្កើនការផ្តល់ប្រព័ន្ធការពារ ដែនអាកាស និងឧបករណ៍ ដែលត្រូវការ សម្រាប់ជួសជុលបណ្តាញ ថាមពលរបស់អ៊ុយក្រែន សម្រាប់រដូវរងា ដែលមកដល់ផងដែរ ។
ក្នុងនាមជាប្រជាជាតិទាំងពីរនៃឥណ្ឌូប៉ាស៊ីហ្វិក មេដឹកនាំទាំងពីរបានឲ្យដឹងថា ពួកគេមានបំណងបង្កើនកិច្ចសហប្រតិបត្តិការ “ជាក់ស្តែង” នៅក្នុងតំបន់ ស្តីពីសន្តិសុខដែនសមុទ្រ ហើយនឹងបន្ត “សម្របសម្រួលលើកង្វល់ របស់យើង ទាក់ទងនឹងបញ្ហាប្រឈមរបស់ប្រទេសចិន ចំពោះសណ្តាប់ធ្នាប់អន្តរជាតិ ដោយផ្អែកលើច្បាប់ រួមទាំងការគោរព សិទ្ធិមនុស្ស” ៕
