ដាកា ៖ ប្រទេសបង់ក្លាដែស បានជាប់ចំណាត់ថ្នាក់ទីពីរម្តងទៀត នៅក្នុងទីផ្សារនាំចេញសម្លៀក បំពាក់ពិភពលោកក្នុងឆ្នាំ២០២១ បន្ទាប់ពីប្រទេសនេះ ត្រូវបានរុញត្រលប់ ទៅកាន់តំណែងទី៣ ដោយប្រទេសវៀតណាម ក្នុងឆ្នាំ២០២០ ។
ទីភ្នាក់ងារសារព័ត៌មានផ្លូវការ របស់ប្រទេសបង់ក្លាដែស BSS បានរាយការណ៍ថា ការពិនិត្យឡើងវិញស្ថិតិពាណិជ្ជកម្ម ពិភពលោកឆ្នាំ២០២២ ដែលចេញផ្សាយដោយអង្គការ ពាណិជ្ជកម្មពិភពលោក (WTO) បានបង្ហាញថាចំណែក របស់វៀតណាម ក្នុងការនាំចេញ សម្លៀកបំពាក់រួចរាល់ជាសកល (RMG) បានធ្លាក់ចុះដល់ ៥,៨ភាគរយនៅឆ្នាំ២០២១ ពី ៦,៤ ភាគរយក្នុងឆ្នាំ២០២០ ។
ចំណែកនៃប្រទេស បង់ក្លាដែស នៅក្នុងទីផ្សារ RMG សកលលោកបានកើនឡើងដល់ ៦,៤ ភាគរយកាលពីឆ្នាំមុនពី ៦,៣ ភាគរយក្នុងឆ្នាំ២០២០ ។ សមាមាត្រនេះគឺ ៦,៨ភាគរយក្នុងឆ្នាំ២០១៩ និង ៦,៤ភាគរយក្នុងឆ្នាំ២០១៨ ។
ការត្រួតពិនិត្យស្ថិតិរបស់អង្គការ ពាណិជ្ជកម្មពិភពលោកក៏បានបង្ហាញផងដែរថា ការនាំចេញ RMG ពីបង់ក្លាដែសបានស្ទុះងើបឡើងវិញ យ៉ាងខ្លាំងកាលពីឆ្នាំមុន ដោយកត់ត្រាកំណើនប្រចាំឆ្នាំ ២៤ភាគរយ ។
នៅក្នុងឆ្នាំ២០២០ ការនាំចេញបានប្រឈមមុខ នឹងការធ្លាក់ចុះដ៏ធំមួយ ហើយបានធ្លាក់ចុះ ១៧ ភាគរយធៀបនឹងកំណើន ៧ភាគរយនៃការនាំចេញ RMG របស់វៀតណាម។
ចំណែកប្រទេសបង់ក្លាដែស ក្នុងទីផ្សារនាំចេញសម្លៀក បំពាក់ពិភពលោកមាន ៤,២ ភាគរយក្នុងឆ្នាំ២០១០ ដែលចំណែករបស់វៀតណាម មាន ២,៩ ភាគរយ ៕
