យូអិន ៖ បេសកជនចិនមួយរូប បានអំពាវនាវឱ្យមានកិច្ចខិតខំប្រឹងប្រែង ដើម្បីធ្វើឱ្យមានឡើងវិញ នូវកិច្ចព្រមព្រៀង នុយក្លេអ៊ែរអ៊ីរ៉ង់ឆ្នាំ២០១៥ រវាងអ៊ីរ៉ង់ និងមហាអំណាចទាំង៦ រួមមានចក្រភពអង់គ្លេស ចិន បារាំង អាល្លឺម៉ង់ រុស្ស៊ី និងសហរដ្ឋអាមេរិក ។
កិច្ចព្រមព្រៀង នុយក្លេអ៊ែរអ៊ីរ៉ង់ ដែលត្រូវបានអនុម័តដោយដំណោះស្រាយ របស់ក្រុមប្រឹក្សាសន្តិសុខ គឺជាសមិទ្ធិផល ដ៏សំខាន់មួយនៃការទូតពហុភាគី ដែលជាឧទាហរណ៍ បុរាណ នៃការដោះស្រាយជម្លោះតាមរយៈការសន្ទនា និង ការពិគ្រោះយោបល់ និងជាសសរស្តម្ភ សម្រាប់របបមិនរីកសាយភាយ នុយក្លេអ៊ែរអន្តរជាតិ និងសន្តិភាព និងស្ថិរភាពនៅមជ្ឈិមបូព៌ា នេះបើតាមលោក Geng Shuang តំណាងអចិន្ត្រៃយ៍រងរបស់ប្រទេសចិនប្រចាំអង្គការសហប្រជាជាតិ ។
ការដកខ្លួនជា ឯកតោភាគី របស់រដ្ឋបាលអាមេរិកពីមុនចេញពីកិច្ចព្រមព្រៀង និងសម្ពាធអតិបរិមា របស់ទីក្រុងវ៉ាស៊ីនតោន ប្រឆាំងនឹងអ៊ីរ៉ង់ បានបង្កឲ្យមាន វិបត្តិនុយក្លេអ៊ែរអ៊ីរ៉ង់។ បន្ទាប់ពីការសម្រេចចិត្ត របស់រដ្ឋបាលអាមេរិកបច្ចុប្បន្ន ដើម្បីត្រលប់ ទៅកិច្ចព្រមព្រៀងនេះ ភាគីនានាបានធ្វើការ ចរចាជាច្រើនជុំជាមួយនឹង វឌ្ឍនភាពវិជ្ជមាន។
លោកបានប្រាប់ក្រុមប្រឹក្សាសន្តិសុខថា ទោះជាយ៉ាងណាក៏ដោយ ជាអកុសលការចរចាបានជាប់គាំងម្តងទៀត ចាប់តាំងពីខែសីហា ដែលធ្វើឱ្យអនាគត នៃបញ្ហានុយក្លេអ៊ែរអ៊ីរ៉ង់ មិនច្បាស់លាស់។
លោកបន្ដថា “នៅពេលដែលស្ថានការណ៍ សន្តិសុខពិភពលោកមានភាព ស្មុគស្មាញ និងធ្ងន់ធ្ងរ របបមិនរីកសាយភាយនុយក្លេអ៊ែរអន្តរជាតិ ប្រឈមមុខនឹងបញ្ហាប្រឈម ហើយកត្តាភូមិសាស្ត្រនយោបាយកាន់តែលេចធ្លោ ចិនអំពាវនាវឱ្យគ្រប់ភាគីពាក់ព័ន្ធ បង្ហាញភាពបន្ទាន់កាន់តែខ្លាំង ទទួលយកទំនួល ខុសត្រូវ របស់ពួកគេ ក្នុងបង្កើនការសន្ទនា និងការចូលរួម ហើយខិតខំឈាន ដល់កិច្ចព្រមព្រៀង ឱ្យបានឆាប់តាមដែល អាចធ្វើទៅបានលើបញ្ហាលេចធ្លោ ក្នុងគោលបំណងស្តារឡើងវិញ នូវភាពត្រឹមត្រូវនៃកិច្ចព្រមព្រៀងទូលំទូលាយ និងការអនុវត្តប្រកប ដោយប្រសិទ្ធភាពរបស់វា”៕
