បរទេស៖ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ទីក្រុងវ៉ាស៊ីនតោន ហាក់ដូចជាមាន បំណងធ្វើសង្រ្គាមតំណាងប្រឆាំងនឹងរុស្ស៊ី ដោយប្រើប្រាស់អ៊ុយក្រែនជាឧបករណ៍។ លោកបានបន្ថែមថា ចំណុចសំខាន់ ដែលដកចេញពីកិច្ចប្រជុំកាលពីថ្ងៃពុធ រវាងមេដឹកនាំប្រទេសទាំងពីរគឺថា ទាំងសហរដ្ឋអាមេរិក និងអ៊ុយក្រែន មិនបានត្រៀមខ្លួនដើម្បីយកចិត្តទុកដាក់ចំពោះការព្រួយបារម្ភរបស់រុស្ស៊ីនោះទេ។
យោងតាមសារព័ត៌មាន RT ចេញផ្សាយនៅថ្ងៃទី២២ ខែធ្នូ ឆ្នាំ២០២២ បានឱ្យដឹងថា លោក Peskov បានប្រាប់ អ្នកសារព័ត៌មានកាលពីថ្ងៃព្រហស្បតិ៍ថា “ជាការពិតណាស់ យើងកំពុងតាមដាន [កិច្ចប្រជុំ] នេះ យើងកំពុងទទួល បានព័ត៌មានដែលចូលមកទាំងអស់” ។ លោកបានបន្ថែមថា នៅក្នុងក្រសែភ្នែករបស់ទីក្រុងមូស្គូ “ទាំងប្រធានាធិបតី Joe Biden និងប្រធានាធិបតី Vladimir Zelensky មិនបាននិយាយពាក្យណាមួយដែលអាចបកស្រាយ បានថាជាការត្រៀម ខ្លួនជាស្រេចដើម្បីយកចិត្តទុកដាក់លើកង្វល់របស់រុស្ស៊ីនោះទេ”។
អ្នកនាំពាក្យវិមានក្រឹមឡាំងបានបន្តសោកស្ដាយចំពោះការពិតដែលថា ប្រធានាធិបតីអាមេរិកបានបរាជ័យក្នុងការ ព្រមានសហសេវិកអ៊ុយក្រែនប្រឆាំង នឹងការបាញ់ផ្លោងនៅតំបន់លំនៅដ្ឋាននៅ Donbass ។ លោកក៏បានលើកឡើងថា ភាគីណាក៏មិនអំពាវនាវរកសន្តិភាពដែរ។
យោងតាមលោក Peskov សហរដ្ឋអាមេរិកកំពុងបន្តធ្វើសង្គ្រាមប្រឆាំងនឹងរុស្ស៊ីដោយប្រយោល “ដល់អ៊ុយក្រែន ចុងក្រោយ” ៕
