បរទេស៖ រដ្ឋមន្ត្រីការបរទេសចិន លោក Wang Yi បាននិយាយនៅថ្ងៃអាទិត្យថា ទំនាក់ទំនងរវាងចិន និងរុស្ស៊ីគឺ “រឹងមាំ” ហើយរាល់ការប៉ុនប៉ងខាងក្រៅ ដើម្បីសាបព្រួសភាពមិនចុះសម្រុង រវាងប្រទេសជិតខាង គឺនឹងក្លាយទៅជាឥតប្រយោជន៍។
យោងតាមសារព័ត៌មាន RT ចេញផ្សាយនៅថ្ងៃទី២៥ ខែធ្នូ ឆ្នាំ២០២២ បានឱ្យដឹងថា លោក Wang បាននិយាយក្នុងអំឡុងពេលសុន្ទរកថា នៅឯសន្និសីទស្តីពីស្ថានភាពអន្តរជាតិ និងទំនាក់ទំនងការបរទេស របស់ប្រទេសចិនថា ភាពជាដៃគូយុទ្ធសាស្ត្ររវាងទីក្រុងប៉េកាំង និងទីក្រុងមូស្គូបានក្លាយទៅជា “មានភាពចាស់ទុំ និងរឹងមាំជាងមុន” ក្នុងរយៈពេលមួយឆ្នាំកន្លងមកនេះ។ លោកបានបន្ថែមថា «ចិន និងរុស្ស៊ីបានគាំទ្រគ្នាយ៉ាងម៉ឺងម៉ាត់ ក្នុងការរក្សាផលប្រយោជន៍ស្នូលរៀងៗខ្លួន»ក្នុងអំឡុងពេលនេះ។
អាមេរិកបានបរាជ័យ ក្នុងការបញ្ចុះបញ្ចូលចិន ឱ្យចូលរួមដាក់ទណ្ឌកម្មអន្តរជាតិប្រឆាំងនឹង រុស្ស៊ីជុំវិញជម្លោះនៅអ៊ុយក្រែន។ ទីក្រុងប៉េកាំងបានអំពាវនាវឱ្យមានសន្តិភាព ប៉ុន្តែបានបញ្ឈប់ការថ្កោលទោស ទៅលើទីក្រុងមូស្គូ សម្រាប់ការចាប់ផ្តើមប្រតិបត្តិការ យោធារបស់ខ្លួន និងបានស្តីបន្ទោសវិបត្តិលើសកម្មភាព របស់លោកខាងលិច រួមទាំងការពង្រីកទៅភាគខាងកើត របស់អង្គការណាតូផងដែរ ។
យោងតាមរដ្ឋមន្ត្រីការបរទេស គឺថា ពាណិជ្ជកម្មទ្វេភាគីរវាងចិន និងរុស្ស៊ីកំពុងឈានដល់គោលដៅ ២០០ពាន់លានដុល្លារក្នុង “ល្បឿនកាន់តែលឿន”។ ទំហំនៃអាជីវកម្មដែលធ្វើឡើង រវាងប្រទេសជិតខាងទាំងពីរ ជារូបិយប័ណ្ណជាតិក៏ត្រូវបានពង្រីកផងដែរ ។ វឌ្ឍនភាពគួរឱ្យកត់សម្គាល់ ក៏ត្រូវបានសម្រេចនៅក្នុងការតភ្ជាប់ ឆ្លងកាត់ព្រំដែនជាមួយនឹងការបើកផ្លូវ និងស្ពានផ្លូវដែកថ្មីនៅឆ្នាំ ២០២២ ៕
ប្រែសម្រួលៈ ណៃ តុលា
