សេអ៊ូល ៖ ប្រភពពីយោធាបានឲ្យដឹងថា យន្តហោះដ្រូនជាច្រើនគ្រឿងមកពីប្រទេសកូរ៉េខាងជើង បានឆ្លងចូលទៅក្នុងប្រទេសកូរ៉េខាងត្បូងកាលពីថ្ងៃចន្ទ ហើយបានហោះពីលើទឹកដី របស់ខ្លួន ដោយជំរុញឱ្យយោធាកូរ៉េខាងត្បូងបាញ់ព្រមានទៅលើពួកគេវិញ។
អគ្គសេនាធិការចម្រុះ បានឲ្យដឹងថា ឧប្បត្តិហេតុដែលបានកត់សម្គាល់ការ លុកលុយដែលគេស្គាល់ជាលើកដំបូង ចូលទៅក្នុងដែនអាកាស របស់កូរ៉េខាងត្បូង ដោយយន្តហោះគ្មានមនុស្ស បើករបស់កូរ៉េខាងជើង ចាប់តាំងពីឆ្នាំ២០១៧ មក គឺជា “ការបង្កហេតុច្បាស់លាស់” ដោយកូរ៉េខាងជើង។
យោងតាម JCS បានឱ្យដឹងថា ក្នុងចំណោមយន្តហោះគ្មានមនុស្សបើក ទាំង ៥គ្រឿង ដែលបានរកឃើញនោះ មួយគ្រឿង បានទៅដល់ភាគខាងជើង នៃតំបន់ទីប្រជុំជនទីក្រុងសេអ៊ូល ខណៈដែល ៤ គ្រឿងទៀតបានហោះនៅជិតកោះ Ganghwa និងតំបន់ Gimpo នៅភាគខាងលិចនៃប្រទេស។
លោក Lee Seung Oh ប្រធានប្រតិបត្តិការនៅ JCS បានឲ្យដឹងក្នុងសន្និសីទ សារព័ត៌មានមួយថា “យោធាកូរ៉េខាងត្បូង បានចាត់វិធានការ តបតបន្ទាប់ពីបានរកឃើញផ្លូវអាកាស មិនស្គាល់អត្តសញ្ញាណជាច្រើន (នៅលើរ៉ាដា) ដែលសង្ស័យថា ជាយន្តហោះដ្រូនរបស់កូរ៉េខាងជើង នៅក្នុងតំបន់ខេត្ត Gyeonggi” ។
លោក Lee បានលើកឡើងថា យោធាកូរ៉េខាងត្បូង ក៏បានដាក់ពង្រាយទ្រព្យសម្បត្តិឃ្លាំមើលទាំងមនុស្ស និងដ្រូន នៅជិតខ្សែបន្ទាត់ព្រំដែនយោធា និងចូលទៅក្នុងផ្ទៃមេឃ របស់កូរ៉េខាងជើង ដើម្បីជាវិធានការតបត រួមទាំងការថតទីតាំងយោធាសំខាន់ៗ នៅក្នុងទឹកដីកូរ៉េខាងជើងផងដែរ។
ប្រភពពី JCS បានឲ្យដឹងទៀតថា យន្តហោះដ្រូនរបស់កូរ៉េខាងជើង ត្រូវបានគេរកឃើញ នៅម៉ោងប្រហែល ១០ និង២៥ នាទីព្រឹក យោធាបានបាញ់ជាង ១០០ គ្រាប់ក្នុងទិសដៅ របស់ពួកគេ ដោយបន្ថែមថា យន្តហោះដ្រូនមិន អាចត្រូវបានគេបាញ់ទម្លាក់ នោះទេ ដោយសារយោធា ត្រូវជៀសវាងការបង្កការ ខូចខាតដល់ផ្ទះជនស៊ីវិល ខាងក្រោម ៕
