តូក្យូ៖ នៅពេលដែលសង្រ្គាម អ៊ុយក្រែន អូសបន្លាយ ប្រទេសជប៉ុន ដែលនឹងធ្វើជាប្រធានក្រុមប្រទេស ឧស្សាហកម្មចំនួន៧ នៅឆ្នាំ២០២៣ គួរតែបង្កើនកិច្ចខិតខំប្រឹងប្រែង ដើម្បីជំរុញឱ្យប្រទេសជាច្រើនទៀត ដាក់ទណ្ឌកម្មលើរុស្ស៊ី និងបន្ថែមសម្ពាធលើទីក្រុងម៉ូស្គូ ឱ្យចូលចរចាជាមួយអ៊ុយក្រែន សម្រាប់បទឈប់បាញ់ ។
មធ្យោបាយដ៏មាន ប្រសិទ្ធភាពមួយ ដើម្បីធ្វើដូច្នេះ គឺសម្រាប់ G-7 ដែលមេដឹកនាំ របស់ពួកគេកំពុងប្រមូលផ្តុំ សម្រាប់កិច្ចប្រជុំកំពូលប្រចាំឆ្នាំ នៅទីក្រុងហ៊ីរ៉ូស៊ីម៉ា ក្នុងខែឧសភា ដើម្បីបង្កើតរណសិរ្សរួបរួមជាមួយប្រទេស ដែលរហូតមកដល់ពេលនេះ បានទប់ទល់នឹងសកម្មភាព ប្រឆាំងនឹងរុស្ស៊ី។
ការឈ្លានពានរបស់រុស្ស៊ី លើអ្នកជិតខាងរបស់ខ្លួនកាលពីចុងខែកុម្ភៈ បាននាំឱ្យរដ្ឋ G-7 រួមមាន អង់គ្លេស កាណាដា បារាំង អាលមលឺម៉ង់ អ៊ីតាលី ជប៉ុន និងសហរដ្ឋអាមេរិក បូករួមទាំង សហភាពអឺរ៉ុប និងប្រទេសមួយចំនួនទៀតដាក់វិធានការ ដាក់ទណ្ឌកម្មជាបន្តបន្ទាប់ លើប្រទេសរុស្ស៊ី ដែលជាប្រទេស ផលិតធនធានធម្មជាតិដ៏សំខាន់ រួមទាំងការហាមប្រាមថាមពល និងការហាមប្រាម លើការលក់ឧបករណ៍អេឡិចត្រូនិក និងសម្ភារៈទំនើបៗដល់ប្រទេស។
លោក Yoko Hirose សាស្ត្រាចារ្យនយោបាយអន្តរជាតិ នៅសកលវិទ្យាល័យ Keio បានឲ្យដឹងថា ជាមួយនឹងទីក្រុងម៉ូស្គូ និងទីក្រុងគៀវ មិនបង្ហាញសញ្ញា នៃការវិលត្រឡប់ទៅកាន់តុចរចារ វិធានការនានា ដែលត្រូវបានអនុវត្តដោយ G-7 មិនបានទទួលផ្លែផ្កានោះទេ។
រុស្ស៊ីមិនបានបង្ហាញពីចេតនាណាមួយ ក្នុងការដកថយពីតំបន់ភាគខាងកើត និងភាគខាងត្បូងអ៊ុយក្រែនចំនួន៤ ដែលលោកប្រធានាធិបតី វ្ល៉ាឌីមៀ ពូទីន បានប្រកាសថា នឹងធ្វើសមាហរណកម្ម ទៅក្នុងប្រជាជាតិរបស់ខ្លួន ខណៈដែលប្រធានាធិបតីអ៊ុយក្រែនលោក វូឡូឌីមៀ ហ្សេឡិនស្គី បានទាមទារឱ្យ ទាហានរុស្ស៊ី ដកខ្លួនចេញពីទឹកដីអ៊ុយក្រែនទាំងអស់ រួមទាំងតំបន់គ្រីមៀ ដែលទីក្រុងមូស្គូបានដាក់បញ្ចូលក្នុងឆ្នាំ២០១៤ ។
លោក Hirose អ្នកជំនាញខាងនយោបាយនៃអតីតសហភាពសូវៀតនិយាយថា “Global South” ឬប្រទេសកំពុងអភិវឌ្ឍន៍នៅក្នុងតំបន់ដូចជាអាស៊ី អាហ្រ្វិក និងអាមេរិកឡាទីន បានរក្សាទំនាក់ទំនងសេដ្ឋកិច្ចធម្មតា របស់ពួកគេជាមួយទីក្រុងម៉ូស្គូ ដោយទុកកន្លែង សម្រាប់ក្រុមហ៊ុនរុស្ស៊ី ដើម្បីបង្កើតប្រាក់ចំណូល បានមកពីថាមពល និងការនាំចេញផ្សេងទៀត ដែលជួយផ្តល់ ហិរញ្ញប្បទានដល់សង្រ្គាមរបស់ប្រទេស៕
