យោងតាមទីបញ្ជាការឥណ្ឌូប៉ាស៊ីហ្វិក របស់សហរដ្ឋអាមេរិក យន្តហោះចម្បាំង J-11 របស់កងទ័ពជើងទឹកចិន បានហោះក្នុងចម្ងាយប្រហែល ៦ម៉ែត្រពីច្រមុះរបស់យន្តហោះឈ្លប យកការណ៍ RC-135 របស់កងទ័ពអាកាស សហរដ្ឋអាមេរិកកាលពីថ្ងៃទី២១ ខែធ្នូ។
នៅក្នុងសេចក្តីថ្លែងការណ៍មួយបានឲ្យដឹងថា ការហោះហើរ “គ្មានសុវត្ថិភាព” បានបង្ខំឱ្យយន្តហោះសហរដ្ឋអាមេរិក ធ្វើសមយុទ្ធគេចវេស ដើម្បីជៀសវាងការប៉ះទង្គិចគ្នា នេះបើយោងតាមការចុះផ្សាយ របស់ទីភ្នាក់ងារសារព័ត៌មានក្យូដូជប៉ុន។
សេចក្តីថ្លែងការណ៍បានឲ្យដឹងទៀតថា “យើងរំពឹងថាប្រទេសទាំងអស់ នៅក្នុងតំបន់ឥណ្ឌូប៉ាស៊ីហ្វិកនឹងប្រើប្រាស់ ដែនអាកាសអន្តរជាតិដោយសុវត្ថិភាព និងស្របតាមច្បាប់អន្តរជាតិ” ដោយកត់សម្គាល់ថាយន្តហោះរ បស់សហរដ្ឋអាមេរិកកំពុងធ្វើប្រតិបត្តិការជាប្រចាំ នៅពេលនោះ។
យោធាអាមេរិកបានបង្ហោះ វីដេអូមួយ ដែលត្រូវគេរាយការណ៍ថាថតចេញ ពីយន្តហោះអាមេរិក នៅលើគេហទំព័ររបស់ខ្លួន ដែលបង្ហាញពីយន្តហោះ ដែលគេជឿថាជាយន្តហោះចម្បាំង J-11 ហោះក្បែរនោះក្នុងរយៈពេលបន្តមុន ពេលចាកចេញ។
ប្រទេសចិន បានប្រតិកម្មយ៉ាងខ្លាំង ចំពោះការអះអាង របស់សហរដ្ឋអាមេរិក ដោយអ្នកនាំពាក្យក្រសួងការបរទេសចិនលោក Wang Wenbin បានឲ្យដឹងនៅក្នុងសន្និសីទ សារព័ត៌មាននៅថ្ងៃសុក្រនេះ នៅទីក្រុងប៉េកាំងថា “សកម្មភាពបង្កហេតុ និងគ្រោះថ្នាក់” របស់ទីក្រុងវ៉ាស៊ីនតោន គឺជាមូលហេតុឫសគល់នៃបញ្ហាសន្តិសុខ ដែនសមុទ្រ ហើយថាសហរដ្ឋអាមេរិក គួរតែបញ្ឈប់ពួកគេ៕
