បរទេស៖ រដ្ឋមន្ត្រីការពារជាតិលោក Ben Wallace បានប្រាប់សភាកាលពីថ្ងៃចន្ទថា ប្រទេសអ៊ុយក្រែននឹងទទួលបាន រថក្រោះប្រយុទ្ធចំនួន Challenger 2 ចំនួន ១៤ គ្រឿងពីចក្រភពអង់គ្លេសមុនរដូវក្តៅ។ ការកំណត់ពេលវេលានេះមានន័យថា រថក្រោះទាំងនោះទំនងជានឹង មកដល់បន្ទាប់ពីរថក្រោះ Leopard របស់អាល្លឺម៉ង់ទៅដល់សមរភូមិ ចំពេលមានអរិភាពរបស់ទីក្រុងគៀវ ជាមួយរុស្ស៊ី។
យោងតាមសារព័ត៌មាន RT ចេញផ្សាយនៅថ្ងៃទី៣០ ខែមករា ឆ្នាំ២០២៣ បានឱ្យដឹងថា នៅពេលសួរថាតើរថក្រោះនឹង ត្រូវដាក់ពង្រាយនៅអ៊ុយក្រែននៅពេលណា លោក Wallace បានប្រាប់សមាជិកសភាថា “វានឹងជាផ្នែកនៃរដូវក្តៅនេះ ឬខែឧសភា – វាប្រហែលជាដល់ពេល Easter”។ សម្រាប់គ្រិស្តសាសនិកលោកខាងលិច បុណ្យ Easter Sunday ត្រូវនឹងថ្ងៃទី ៩ ខែមេសា ឆ្នាំនេះ។
លោក Wallace បាននិយាយទៀតថា លោកមិនអាចផ្តល់ព័ត៌មានបន្ថែម អំពីដំណើរការហ្វឹកហាត់ សម្រាប់ប្រតិបត្តិកររបស់ រថក្រោះអ៊ុយក្រែនបានទេ។ ចំណែក លោក Vadim Pristaiko ឯកអគ្គរដ្ឋទូតរបស់ទីក្រុងគៀវ ប្រចាំចក្រភពអង់គ្លេស បានប្រាប់ប្រព័ន្ធផ្សព្វផ្សាយអ៊ុយក្រែន កាលពីសប្តាហ៍មុនថា ដំណើរការនេះ “នឹងមិនចំណាយពេលច្រើនទេ” ៕
ប្រែសម្រួលៈ ណៃ តុលា
