ប៉ារីស៖ បន្ទាប់ពីដំណើរទស្សនកិច្ចនៅចក្រភពអង់គ្លេស ប្រធានាធិបតីអ៊ុយក្រែន លោក វូឡូឌីមៀ ហ្សេឡិនស្គី បានឈប់សម្រាកនៅទីក្រុងប៉ារីស កាលពីល្ងាចថ្ងៃពុធ ហើយបានជួបជាមួយប្រធានាធិបតីបារាំងលោក អេម៉ានុយអែល ម៉ាក្រុង និងអធិការបតីអាល្លឺម៉ង់លោក Olaf Scholz ។
ពិធីជប់លៀង ត្រីភាគីត្រូវបានធ្វើឡើងនៅការិយាល័យប្រធានាធិបតីបារាំងដើម្បី “បន្តការសម្របសម្រួលយ៉ាងជិតស្និទ្ធ ដែលធ្វើឱ្យវាអាចធ្វើទៅបាន ដើម្បីឆ្លើយតបយ៉ាងឆាប់រហ័ស និងប្រកបដោយប្រសិទ្ធភាព ចំពោះតម្រូវការដែលបានបង្ហាញដោយទីក្រុងគៀវ” នេះបើយោងតាមវិមាន Elysee ។
ក្នុងអំឡុងសន្និសីទសារព័ត៌មានដែលធ្វើឡើងនៅវិមាន Elysee យប់ថ្ងៃពុធ លោក ម៉ាក្រុង បានបញ្ជាក់ជាថ្មីថា ការគាំទ្រ “មិនផ្លាស់ប្តូរ” របស់បារាំង និងអឺរ៉ុបចំពោះអ៊ុយក្រែន។ លោកបានបន្តថា “អ្វីដែលកំពុងលេងនៅអ៊ុយក្រែនប៉ះពាល់ដល់អនាគតរបស់អឺរ៉ុប”។
នៅក្នុងនោះដែរលោក ហ្សេឡិនស្គី បានស្នើសុំអាវុធម្តងទៀតដោយបន្ថែមថា អ៊ុយក្រែនត្រូវការអាវុធធុនធ្ងន់ និងយន្តហោះ “ឱ្យបានឆាប់តាមដែលអាចធ្វើទៅបាន” ។
លោក ម៉ាក្រុង និង Scholz បានឲ្យដឹងថា ប្រទេសបារាំង អាល្លឺម៉ង់ និងសហភាពអឺរ៉ុប មានបំណងបន្ត “កិច្ចខិតខំប្រឹងប្រែង” របស់ពួកគេក្នុងការផ្តល់អាវុធ។ នៅក្នុងនោះលោក Scholz បានសង្កត់ធ្ងន់ថា អាល្លឺម៉ង់ នឹងបន្តគាំទ្រអ៊ុយក្រែន “ដរាបណាចាំបាច់”៕
