បរទេស៖ ចក្រភពអង់គ្លេសបានផ្តល់អំណោយ ដែលមានជាកាំភ្លើងធំ និងកាំភ្លើងយន្ត និងរថពាសដែកជាងមួយរយគ្រឿង ដល់ទីក្រុងគៀវ រួចហើយ ហើយឥឡូវនេះអង់គ្លេស ក៏បានសន្យាផ្តល់រថក្រោះ Challenger 2 ចំនួន ១៤ គ្រឿង និងកាំភ្លើងស្វ័យប្រវត្តិបន្ថែមទៀត។ ប៉ុន្តែប្រធានាធិបតីអ៊ុយក្រែន បានធ្វើដំណើរទៅទីក្រុងឡុងដ៍ កាលពីថ្ងៃពុធ ដើម្បីទាមទារបន្ថែមទៀត។
យោងតាមសារព័ត៌មាន Sputnik ចេញផ្សាយនៅថ្ងៃទី៩ ខែកុម្ភៈ ឆ្នាំ២០២៣ បានឱ្យដឹងថាចក្រភពអង់គ្លេស គ្មានយន្តហោះចម្បាំង ដែលត្រូវផ្តល់ឲ្យអ៊ុយក្រែនទេ នោះគឺជាទស្សនៈច្បាស់លាស់ របស់រដ្ឋមន្ត្រីរដ្ឋាភិបាល និងមន្ត្រីកងទ័ពអាកាស (RAF)។
ការអត្ថាធិប្បាយរបស់អង់គ្លេសនៅពេលនេះ គឺបានរិះគន់ទៅលើ ការស្នើសុំអាវុធកម្រិតខ្ពស់ ចុងក្រោយ របស់ប្រធានាធិបតីអ៊ុយក្រែនលោក Volodymyr Zelensky ពីសម្ព័ន្ធភាពដែលគ្រប់គ្រងដោយសហរដ្ឋអាមេរិករបស់អង្គការ NATO ដែលឥឡូវនេះបានកើនឡើង រហូតដល់ការទាមទារ ឱ្យយន្តហោះចម្បាំង ដើម្បីវាយប្រហារយ៉ាងជ្រៅ ទៅក្នុងប្រទេសរុស្ស៊ី។
រដ្ឋមន្ត្រីនៅក្នុងខុទ្ទកាល័យ ដែលមិនបញ្ចេញឈ្មោះម្នាក់ បានប្រាប់កាសែតប្រចាំថ្ងៃមួយកាលពីថ្ងៃព្រហស្បតិ៍ ដោយកំហឹងថា “យើងមិនមានយន្តហោះណាមួយដើម្បីផ្តល់ឱ្យនោះទេ!” ។
សូមជម្រាបថា ក្នុងអំឡុងពេលដំណើរទស្សនកិច្ច ដ៏គួរឱ្យភ្ញាក់ផ្អើល របស់លោក Volodymyr Zelensky ទៅកាន់ចក្រភពអង់គ្លេស កាលពីថ្ងៃពុធ លោក Zelensky បានថ្លែងអំណរគុណ ដល់សមាជិកសភា ដែលបានប្រមូលផ្តុំគ្នា នៅក្នុងសាល Westminster របស់សភា “ជាមុនសម្រាប់យន្តហោះអង់គ្លេស ដ៏មានឥទ្ធិពល” ដែលលោកចង់បាន ៕
ប្រែសម្រួលៈ ណៃ តុលា
