បរទេស៖ អ្នកនាំពាក្យក្រសួងការពារជាតិចិន លោក Tan Kefei បាននិយាយនៅថ្ងៃសុក្រថា ប្រទេសចិនទាមទារឱ្យសហរដ្ឋអាមេរិក បញ្ឈប់រាល់ទំនាក់ទំនងយោធាជាមួយតៃវ៉ាន់ និងបញ្ឈប់ការលក់អាវុធទៅកាន់កោះនេះ។
យោងតាមសារព័ត៌មាន RT ចេញផ្សាយនៅថ្ងៃទី៣ ខែមីនា ឆ្នាំ២០២៣ បានឱ្យដឹងថា លោក Tan បាននិយាយថា “ប្រទេសចិនទាមទារឱ្យសហរដ្ឋអាមេរិក ឈប់លក់អាវុធឱ្យតៃវ៉ាន់ និងទំនាក់ទំនងយោធាជាមួយតៃប៉ិ បញ្ឈប់ការជ្រៀតជ្រែកក្នុងបញ្ហាកោះតៃវ៉ាន់ និងធ្វើឱ្យភាពតានតឹងនៅច្រក សមុទ្រតៃវ៉ាន់កាន់តែធ្ងន់ធ្ងរ” ។
មន្ត្រីដដែលបានបន្ថែមថា រដ្ឋាភិបាលក្រុងប៉េកាំងក៏បាន ធ្វើតំណាងទៅទីក្រុងវ៉ាស៊ីនតោន លើការយល់ព្រមលើកិច្ចព្រមព្រៀង ដែលអាចធ្វើទៅបានដើម្បីលក់ គ្រាប់ទៅឱ្យកោះតៃវ៉ាន់ សម្រាប់យន្តហោះចម្បាំង F-16 និងឧបករណ៍ដែលផលិត ដោយសហរដ្ឋអាមេរិកដែលមានតម្លៃជាង ៦០០លានដុល្លារ។ «ចិនប្រឆាំងយ៉ាងខ្លាំងចំពោះការ លក់អាវុធទៅឱ្យតៃវ៉ាន់ ដោយសហរដ្ឋអាមេរិក។
សកម្មភាពរបស់អាមេរិក គឺជាការជ្រៀតជ្រែកយ៉ាងធ្ងន់ធ្ងរ នៅក្នុងកិច្ចការផ្ទៃក្នុងរបស់ចិន បំពានយ៉ាងធ្ងន់ធ្ងរលើគោលការណ៍ ‘ចិនតែមួយ’ និងបទប្បញ្ញត្តិនៃសេចក្តីថ្លែងការណ៍រួម ទាំងបីរបស់អាមេរិក-ចិន បណ្តាលឱ្យខូចខាតយ៉ាងធ្ងន់ធ្ងរ ដល់អធិបតេយ្យភាព និងផលប្រយោជន៍សន្តិសុខ របស់ប្រទេសចិន និងបង្កការគំរាមកំហែង យ៉ាងធ្ងន់ធ្ងរដល់សន្តិភាព និងស្ថិរភាព។ នៅច្រកសមុទ្រតៃវ៉ាន់” ។លោក Tan បាននិយាយដោយបន្ថែមថា ប្រទេសចិនបានធ្វើតំណាងឱ្យភាគីអាមេរិក លើបញ្ហានេះរួចហើយ ៕
ប្រែសម្រួលៈ ណៃ តុលា
