ប៉េកាំង ៖ អ្នកនាំពាក្យម្នាក់បានឲ្យដឹងថា ប្រទេសចិន ជំរុញឱ្យប្រទេសជប៉ុនធ្វើការពិគ្រោះជាមួយភាគីពាក់ព័ន្ធ និងអង្គការអន្តរជាតិដែលពាក់ព័ន្ធទាំងស្រុង ទាក់ទងនឹងផែនការបញ្ចេញទឹកកខ្វក់នុយក្លេអ៊ែររបស់ខ្លួន នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិស៊ិនហួ។
អ្នកនាំពាក្យក្រសួងការបរទេសចិន លោកស្រី ម៉ៅ នីង បានធ្វើការកត់សម្គាល់នៅក្នុងសន្និសីទសារព័ត៌មានប្រចាំថ្ងៃមួយ នៅពេលត្រូវបានសួរឱ្យធ្វើអត្ថាធិប្បាយ លើរបាយការណ៍ប្រព័ន្ធផ្សព្វផ្សាយ ដែលនាយករដ្ឋមន្រ្តីជប៉ុនលោក Fumio Kishida បានឲ្យដឹងកាលពីសប្តាហ៍មុនថា ទឹកកខ្វក់នុយក្លេអ៊ែរនៅ Fukushima នឹងត្រូវបានបញ្ចេញទៅក្នុងមហាសមុទ្រ នៅចន្លោះនិទាឃរដូវ និងរដូវក្តៅឆ្នាំនេះ។
លោកស្រី បានលើកឡើងថា “យើងបានកត់សម្គាល់របាយការណ៍ ដែលពាក់ព័ន្ធ និងមានការព្រួយបារម្ភយ៉ាងខ្លាំង។ ដោយមិនយកចិត្តទុកដាក់ ចំពោះការព្រួយបារម្ភយ៉ាងខ្លាំងរបស់ប្រជាជននៅក្នុងប្រទេសជប៉ុន និងពិភពលោកទាំងមូល រដ្ឋាភិបាលជប៉ុន បានកំណត់លើការជំរុញតាមរយៈផែនការបញ្ចេញទឹកសមុទ្រ ទោះបីជាមានកាតព្វកិច្ចនៅក្រោមច្បាប់អន្តរជាតិក៏ដោយ។ លោកស្រីថា “ទង្វើមិនទទួលខុសត្រូវ ដែលនឹងបង្កគ្រោះថ្នាក់ដល់បរិស្ថានសមុទ្រពិភពលោក និងសុខភាពមនុស្ស”។
ប្រទេសជប៉ុន បានស្តុកទុកទឹកកខ្វក់នុយក្លេអ៊ែរជាង ១,៣ លានតោន ដែលមានន័យថា ការបញ្ចេញរបស់វាទៅក្នុងមហាសមុទ្រអាចចំណាយពេលរហូតដល់ ៣០ឆ្នាំ។ លោកស្រី បានលើកឡើងថា ទឹកមានផ្ទុកសារធាតុ radionuclides ជាង ៦០ភាគរយ ដែលនឹងដឹកជញ្ជូនតាមមហាសមុទ្រទៅកាន់គ្រប់ផ្នែកនៃពិភពលោកក្នុងរយៈពេលមួយទសវត្សរ៍ ដែលបង្កគ្រោះថ្នាក់ ដែលមិនអាចទាយទុកជាមុនបានដល់បរិស្ថានសមុទ្រ និងសុខភាពរបស់មនុស្ស។
អ្នកនាំពាក្យរូបនេះបានបន្ថែមថា “អ្នកជិតខាងរបស់ប្រទេសជប៉ុន រួមទាំងប្រទេសចិន សាធារណរដ្ឋកូរ៉េ សាធារណរដ្ឋប្រជាធិបតេយ្យប្រជាមានិតកូរ៉េ និងរុស្ស៊ី និងបណ្តាប្រទេសកោះប៉ាស៊ីហ្វិក បានសម្តែងការព្រួយបារម្ភ និងការប្រឆាំងយ៉ាងម៉ឺងម៉ាត់ ចំពោះផែនការបញ្ចេញនុយក្លេអ៊ែរចូលទឹកសមុទ្រមួយនេះ”។
លោកស្រីបានសង្កត់ធ្ងន់ថា វាជាកាតព្វកិច្ចរបស់ប្រទេសជប៉ុន ក្រោមច្បាប់អន្តរជាតិទូទៅ និងអនុសញ្ញាអង្គការសហប្រជាជាតិ ស្តីពីច្បាប់សមុទ្រក្នុងការទប់ស្កាត់ការបំពុលបរិស្ថាន កាត់បន្ថយផលប៉ះពាល់គ្រោះថ្នាក់ ពិគ្រោះជាមួយប្រទេស ដែលអាចរងផលប៉ះពាល់យ៉ាងពេញលេញ ធានាតម្លាភាព និងចូលរួមក្នុងកិច្ចសហប្រតិបត្តិការអន្តរជាតិ៕
