ប្រធានាធិបតីអ៊ីស្រាអ៊ែល ព្រមានថា នឹងអាចកើតឡើងនូវ សង្គ្រាមស៊ីវិលក្នុងប្រទេស

បរទេស៖ យោងតាមការចេញផ្សាយរបស់RT លោកប្រធានាធិបតីអ៊ីស្រាអ៊ែល Isaac Herzog កាលពីថ្ងៃម្សិលមិញនេះ បានចេញសេចក្តីព្រមានចំៗថា ប្រទេសអ៊ីស្រាអ៊ែលកំពុងឈរមួយជំហ៊ានទៀត ដែលអាចធ្លាក់ចូលទៅក្នុងមាត់ជ្រោះ នៃសង្គ្រាមស៊ីវិលដោយសារតែការស្នើកំណែទម្រង់ ប្រព័ន្ធតុលាការដោយរដ្ឋាភិបាលថ្មី។

ក្នុងគ្រាដែលមានការតវ៉ាប្រឆាំង នៅស្ទើរគ្រប់ទីកន្លែងក្នុងប្រទេសនោះ លោកប្រធានាធិបតីក៏បានធ្វើការលើកឡើង អំពីកំណែទំរង់ថ្មីមួយចំនួន សម្រាប់ជំនួសសំណើររបស់រដ្ឋាភិបាលថ្មីដែរ ប៉ុន្តែវាត្រូវបានបដិសេធ ដោយលោកនាយករដ្ឋមន្ត្រី Benjamin Netanyahu។

លោក Herzog បានពោលបន្ថែមបែបនេះថា៖ សម្រាប់អ្នកដែលមិនបានគិតថា សង្គ្រាមស៊ីវិលនឹងមិនអាចកើតឡើង នោះវាជាក់ស្តែងកំពុងស្ថិតនៅកៀក យើងទាំងអស់គ្នាហើយនៅពេលនេះ ប៉ុន្តែទោះក្នុងតម្លៃណាឬការសម្រេចចិត្ត បែបណាទេខ្ញុំនឹងមិនអាចអនុញ្ញាតិឲ្យ ហេតុការណ៍នេះកើតឡើងបាននោះដែរ។

គួរឲ្យដឹងដែរថា កាលពីចុងសប្តាហ៍កន្លងមកពលរដ្ឋអ៊ីស្រាអ៊ែល រាប់ពាន់នាក់នៅតាមទីក្រុងធំៗដូចជា Tel Aviv, Jerusalem, Haifa និងទីក្រុងផ្សេងៗទៀតបាននាំគ្នា តវ៉ាប្រឆាំងទៅនឹងគោលការណ៍ច្បាប់ថ្មី ដែលសភាកំពុងបោះឆ្នោតដើម្បីអនុម័ត ៕

ប្រែសម្រួល៖ ស៊ុន លី