ព័ត៌មានអន្តរជាតិ

ដំណើរទស្សនកិច្ចសម្ងាត់របស់លោក គីស៊ីដា ទៅកាន់ទីក្រុងគៀវ មិនមានឥទ្ធិពលច្រើនលើវិបត្តិអ៊ុយក្រែននោះទេ

ប៉េកាំង៖ ក្រសួងការបរទេសជប៉ុនបានឲ្យដឹងថា នាយករដ្ឋមន្ត្រីជប៉ុនលោក ហ្វូមីអូ គីស៊ីដា បានទៅបំពេញទស្សនកិច្ចនៅអ៊ុយក្រែន កាលពីថ្ងៃអង្គារ ដើម្បីជួបពិភាក្សាជាមួយប្រធានាធិបតីអ៊ុយក្រែនលោក វូឡូឌីមៀ ហ្សេឡិនស្គី ក្នុងទីក្រុងគៀវ ដោយក្រុមអ្នកជំនាញជឿថា ដំណើរទស្សនៈកិច្ចនេះ កាន់តែបង្ហាញ ថានឹងមិនមានឥទ្ធិពលជាក់ស្តែងច្រើនលើវិបត្តិអ៊ុយក្រែននោះទេ។

ដំណើរ​ទស្សនកិច្ច​នេះ​ត្រូវ​បាន​រក្សា​ទុក​ជា​សម្ងាត់​រហូត​ដល់​មុន​ការ​មក​ដល់​របស់​លោក​បាន​កើត​ឡើង​មួយ​ថ្ងៃ​បន្ទាប់​ពី​លោក គីស៊ីដា បាន​ជួប​ជាមួយ​នាយក​រដ្ឋមន្ត្រី​ឥណ្ឌា ណារិនដ្រា ម៉ូឌី ក្នុង​ទីក្រុងញូវដេលី។ បើ​តាម​សារព័ត៌មាន Kyodo News ថា វា​កម្រ​ណាស់ ​សម្រាប់​មេដឹកនាំ​ជប៉ុន​ក្នុង​ការ​ធ្វើ​ដំណើរ​ទៅ​ប្រទេស​ក្រៅ​ដោយ​មិន​បាន​ប្រកាសបែបនេះ។

វីដេអូដែលថតបានដោយទូរទស្សន៍ Nippon របស់ប្រទេសជប៉ុន បានបង្ហាញពីលោក គីស៊ីដា ឡើងរថភ្លើងនៅស្ថានីយ៍មួយក្នុងទីក្រុង Przemysl ដែលជាទីក្រុងនៅភាគអាគ្នេយ៍ប្រទេសប៉ូឡូញ ជាប់ព្រំដែនជាមួយអ៊ុយក្រែន កាលពីថ្ងៃអង្គារ។

អ្នកនាំពាក្យក្រសួងការបរទេសចិន លោក Wang Wenbin បានឲ្យដឹងថា សហគមន៍អន្តរជាតិ គួរតែប្រកាន់ខ្ជាប់នូវទិសដៅត្រឹមត្រូវនៃការលើកកម្ពស់កិច្ចចរចាសន្តិភាព និងបង្កើតលក្ខខណ្ឌសម្រាប់ដំណោះស្រាយនយោបាយនៃវិបត្តិអ៊ុយក្រែន។ លោក Wang បានកត់សម្គាល់ថា មានការសង្ឃឹមថា ភាគីជប៉ុននឹងខិតខំប្រឹងប្រែងបន្ថែមទៀតដើម្បីធ្វើឱ្យស្ថានការណ៍ត្រជាក់ជាជាងផ្ទុយមកវិញ។

លោក គីស៊ីដា និងលោក ហ្សេឡិនស្គី ត្រូវបានគេរំពឹងថា នឹងពិភាក្សាអំពីការគាំទ្ររបស់ជប៉ុន សម្រាប់ការកសាងឡើងវិញរបស់អ៊ុយក្រែន ហើយលោក គីស៊ីដា គ្រោងនឹងបង្ហាញពីការប្តេជ្ញាចិត្តរបស់ជប៉ុនក្នុងការគាំទ្រប្រទេសនេះ នៅមុនកិច្ចប្រជុំកំពូលមួយក្រុម ដែលលោកនឹងធ្វើជាម្ចាស់ផ្ទះ G7 នៅទីក្រុងហ៊ីរ៉ូស៊ីម៉ា ក្នុងខែឧសភា៕ប្រែសម្រួល ឈូក បូរ៉ា

To Top