ប៉េកាំង៖ ពាណិជ្ជកម្មរវាងប្រទេសចិន និងប្រទេសនៅតាមដងទន្លេមេគង្គ បានកើនឡើងជាលំដាប់កាលពីឆ្នាំមុន បើទោះជាមានជំងឺកូវីដ-១៩ និងសេដ្ឋកិច្ចពិភពលោកធ្លាក់ចុះក៏ដោយ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
ដោយសារការជឿទុកចិត្តគ្នា និងកិច្ចសហប្រតិបត្តិការកាន់តែស៊ីជម្រៅ ទំហំពាណិជ្ជកម្មរបស់ចិនជាមួយកម្ពុជា ឡាវ មីយ៉ាន់ម៉ា ថៃ និងវៀតណាម មានចំនួនសរុប ៤១៦,៧ ពាន់លានដុល្លារក្នុងឆ្នាំ២០២២ កើនឡើង ៥ ភាគរយពីមួយឆ្នាំទៅមួយឆ្នាំ។
តួលេខនេះត្រូវបានលាតត្រដាង នៅក្នុងពិធីបើកសប្តាហ៍កិច្ចសហប្រតិបត្តិការ Lancang-Mekong 2023 ដែលបានធ្វើឡើងកាលពីថ្ងៃព្រហស្បតិ៍ នៅទីក្រុងគុនមិញ រដ្ឋធានីនៃខេត្តយូណាន ភាគនិរតីនៃប្រទេសចិន។
ក្នុងឆ្នាំ២០១៦ យន្តការកិច្ចសហប្រតិបត្តិការមេគង្គ-ឡានឆាង ត្រូវបានដាក់ឱ្យដំណើរការដោយប្រទេសចិន កម្ពុជា ឡាវ មីយ៉ាន់ម៉ា ថៃ និងវៀតណាម។ វាបានមកពីឈ្មោះរបស់វាពីទន្លេមួយ ដែលត្រូវបានគេហៅថា Lancang នៅក្នុងប្រទេសចិន និងទន្លេមេគង្គក្នុងប្រទេស៥ ផ្សេងទៀត។
ចាប់តាំងពីពេលនោះមក យន្តការនេះបានក្លាយជាគំរូ កិច្ចសហប្រតិបត្តិការដ៏សំខាន់នៅក្នុងតំបន់ ហើយវាបានបញ្ចូលភាពរឹងមាំ ជាបន្តបន្ទាប់ទៅក្នុងការអភិវឌ្ឍន៍ក្នុងតំបន់ ៕
ប្រែសម្រួល ឈូក បូរ៉ា
