បរទេស៖ ប្រធានាធិបតីប្រេស៊ីលលោក Luiz Inacio Lula dad Silva តាមផែនការគ្រោងនឹង ធ្វើការបង្ហាញសេចក្តីព្រាង ស្តីអំពីសន្តិភាពនៅអ៊ុយក្រែនក្នុងពេលដែល លោកនឹងមានជំនួបជាមួយនឹង ប្រធានាធិបតីចិនលោក Xi Jinping នាក្នុងសប្តាហ៍នេះ។
យោងតាមការបញ្ជាក់អះអាង ដោយរដ្ឋមន្ត្រីការបរទេសប្រេស៊ីល ទៅកាន់ក្រុមអ្នកយកព័ត៌មានរបស់ The Financial Times បានឲ្យដឹងទៀតដែរថាលោក Lula នៅតែរក្សាជំហអព្យាក្រិតសម្រាប់ជម្លោះ នៅអ៊ុយក្រែនហើយជឿជាក់ថា ប្រេស៊ីលនឹងអាចមានឱកាស ក្នុងការជួយដោះស្រាយបញ្ហានេះ និងជួយសម្របសម្រួលឲ្យដល់ កិច្ចព្រមព្រៀងសន្តិភាពណាមួយជាមិនខាន។
លោករដ្ឋមន្ត្រីការបរទេសប្រេស៊ីល Mauro Vieira បានបញ្ជាក់ទៀតថា៖ យើងចាប់អារម្មណ៍យ៉ាងខ្លាំងក្នុងការលើកកម្ពស់ ឬជួយបង្កើតកិច្ចប្រជុំមួយចំនួន ដែលនឹងនាំទៅរកដំណើរការសន្តិភាព។ លោកប្រធានាធិបតីក៏បាននិយាយ ជាច្រើនណាស់អំពីសង្គ្រាម ប៉ុន្តែពាក្យតិចណាស់អំពីសន្តិភាព។
ទើបចូលកាន់តំណែងថ្មីៗនេះ មេដឹកនាំប្រេស៊ីលរូបនេះ បានជួបជាមួយប្រធានាធិបតីអាមេរិក Joe Biden និងអធិការបតីអាល្លឺម៉ង់ Olaf Scholz ហើយបាននិយាយតាមទូរស័ព្ទជាមួយ Zelensky និង Putinផងដែរដើម្បីពិភាក្សាអំពី បញ្ហាស្វែងរកសន្តិភាពនៅអ៊ុយក្រែន ៕
ប្រែសម្រួល៖ ស៊ុន លី
