ឡុងដ៍៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី២៨ ខែមីនា ឆ្នាំ២០២៣ថា កងកម្លាំងរុស្ស៊ី កំពុងឆ្ពោះទៅមុខនៅក្នុងទីក្រុង Bakhmut ភាគខាងកើតអ៊ុយក្រែន បើទោះបីជាមានការតស៊ូយ៉ាងខ្លាំងក្លា និងស្ទើរតែបានគ្រប់គ្រងទាំងស្រុងនូវរោងចក្រលោហៈនៅទីនោះក៏ដោយ ។ មេដឹកនាំដែលដំឡើងដោយរុស្ស៊ីនៅក្នុងតំបន់បានលើកឡើងដូច្នេះ ។
ការអះអាងរបស់លោកបានប្រឆាំងនឹងការពិពណ៌នារបស់អ៊ុយក្រែន និងលោកខាងលិចអំពីស្ថានការណ៍ក្នុងទីក្រុង ដែលពួកគេបានលើកឡើងថា មានស្ថិរភាព ខណៈការវាយលុករបស់រុស្ស៊ីបានធ្លាក់ចុះ ។
សមរភូមិនៅក្រុង Bakhmut ដែលរុស្ស៊ីហៅតាមឈ្មោះសម័យសូវៀតថា Artyomovsk មានរយៈពេលជាច្រើនខែគឺជាចំណុចស្នូលនៃសង្គ្រាមរបស់ទីក្រុងម៉ូស្គូមកលើអ៊ុយក្រែន ដែលប្រទេសនេះហៅថា ជា “ប្រតិបត្តិការយោធាពិសេស” ។
លោក Denis Pushilin មេដឹកនាំដែលតែងតាំងដោយរុស្ស៊ី នៃផ្នែកនៃតំបន់ Donetsk របស់អ៊ុយក្រែន ក្រោមការគ្រប់គ្រងរបស់ទីក្រុងម៉ូស្គូ បានលើកឡើងថា កងកម្លាំងអ៊ុយក្រែនភាគច្រើនត្រូវបានបង្ខំឱ្យដកថយពីរោងចក្រលោហៈ AZOM នៅផ្នែកខាងលិចនៃទន្លេ Bakhmutka ។
លោក Pushilin បានថ្លែងថា “រឿងសំខាន់នៅទីនេះគឺការបោសសម្អាតតំបន់ឧស្សាហកម្មនៅរោងចក្រខ្លួនឯង។ អ្នកអាចនិយាយបានជាក់ស្តែងថា ពេលនេះត្រូវបានធ្វើរួច ដោយបុរសៗទើបតែបញ្ចប់ការប្រយុទ្ធ សំដៅលើអ៊ុយក្រែននៅទីនោះ ដែលនៅសល់តែក្នុងក្រុមឯកោតែប៉ុណ្ណោះ” ៕ប្រែសម្រួលដោយ៖ ម៉ៅ បុប្ផាមករា
