ម៉ូស្គូ ៖ កងកម្លាំងរុស្ស៊ី ដឹកនាំដោយទាហានស៊ីឈ្នួលរបស់ក្រុម Wagner Group បានដណ្តើមយកតំបន់ ភាគកណ្តាលនៃទីក្រុង Bakhmut ភាគខាងកើតប្រទេស អ៊ុយក្រែន ក្នុងអំឡុងសប្តាហ៍ទី៥៨ នៃសង្រ្គាម ហើយទោះយ៉ាងណាក៏ដោយ ក្រុមអ្នកការពារអ៊ុយក្រែន នៅតែរក្សាការឃ្លាំមើល សកម្មភាព របស់កងទ័ពរុស្ស៊ី ហើយមេបញ្ជាការ របស់ពួកគេបានឲ្យដឹងថា ការវាយលុករបស់រុស្ស៊ី ឥឡូវនេះបានធ្លាក់ចុះយ៉ាងច្បាស់។
ក្នុងពេលជាមួយគ្នានោះ ជនស៊ីវិលដែលគាំទ្ររុស្ស៊ី កំពុងជម្លៀសតំបន់ ដែលកាន់កាប់ភាគខាងត្បូង ខណៈដែលទាហានអ៊ុយក្រែន រាប់ពាន់នាក់បានបញ្ចប់ការហ្វឹកហ្វឺន នៅក្រៅប្រទេសរបស់ពួកគេ សម្រាប់ការវាយលុក ដែលអាចកើតមាននៅចុងខែនេះ។
ទាហានស៊ីឈ្នួល Wagner បានឈានជើងចូលកណ្តាលក្រុង Bakhmut កាលពីថ្ងៃទី ៣១ ខែមីនា។ ខ្សែវីដេអូភូមិសាស្ត្របានបង្ហាញពួកគេ ក្នុងចម្ងាយ ៤០០ម៉ែត្រនៃសាលាក្រុង ក្នុងទីក្រុងសមរភូមិមួយនេះ។
ពីរថ្ងៃក្រោយមក បន្ទាប់ពីការប្រយុទ្ធគ្នាមួយយប់ ប្រធានាធិបតីអ៊ុយក្រែនលោក វូឡូឌីមៀ ហ្សេឡិនស្គី បានពណ៌នាថា សង្គ្រាមកាន់តែកើនកំដៅ ហើយវីដេអូភូមិសាស្ត្របានបង្ហាញឱ្យឃើញស្ថាបនិកក្រុមទាហានស៊ីឈ្នួល Wagner លោក Yevgeny Prigozhin លើកទង់ជាតិរុស្ស៊ីនៅលើសាលាក្រុង។
លោក Prigozhin បាននិយាយនៅក្នុងសារជាសំឡេងថា “តាមទស្សនៈផ្លូវច្បាប់ទីក្រុង Bakhmut ត្រូវយកបានហើយ” ។ ក្រុមទាហានស៊ីឈ្នួល Wagner ក៏ត្រូវបានគេយល់ថា បានទទួលការគ្រប់គ្រងពេញលេញនៃបរិវេណឧស្សាហកម្ម AZOM ។
នៅថ្ងៃទី០៣ ខែមេសា កងកម្លាំងរុស្ស៊ី ទំនងជាបានរុលទៅមុខនៅភាគខាងត្បូងទីក្រុង Bakhmut ខិតទៅជិតកីឡដ្ឋាន Avangard ហើយអ្នកសរសេរប្លុកយោធារុស្ស៊ីបានអះអាងនៅថ្ងៃទី០៤ ខែមេសាថា កងកម្លាំង Wagner បានវាយយកបានស្ថានីយ៍រថភ្លើង Bakhmut-1 បានសម្រេចហើយ៕
ប្រែសម្រួល ឈូក បូរ៉ា
