បរទេស៖ រដ្ឋមន្ត្រីក្រសួងការពារជាតិរបស់ប្រទេស ស៊ែប៊ី លោក Milos Vucevic បានទទូចថា របាយការណ៍ដែលស៊ែប៊ី កំពុងបញ្ជូនអាវុធទៅអ៊ុយក្រែន គឺជា “ការកុហក” ។
យោងតាមសារព័ត៌មាន RT ចេញផ្សាយនៅថ្ងៃទី១២ ខែមេសា ឆ្នាំ២០២៣ បានឱ្យដឹងថា សេចក្តីថ្លែងការណ៍របស់រដ្ឋមន្រ្តីការពារជាតិនេះ បានធ្វើឡើងបន្ទាប់ពីសារព័ត៌មាន Reuters បានដកស្រង់ឯកសាររបស់មន្ទីរបញ្ចកោណ ដែលបានចាត់ថ្នាក់កាលពីថ្ងៃពុធដែលអះអាងថា រដ្ឋាភិបាលទីក្រុង Belgrade ប្តេជ្ញាផ្តល់ជំនួយធុនធ្ងន់ដល់អ៊ុយក្រែន ដែលវាប្រហែលជាបានផ្តល់រួចហើយ ។
យោងតាមទីភ្នាក់ងារសារព័ត៌មាន ឯកសារនេះស្ថិតក្នុងចំណោម ឯកសារសម្ងាត់របស់សហរដ្ឋអាមេរិក រួមទាំងរបាយការណ៍ចារកម្ម ដែលត្រូវបានលេចធ្លាយតាម អ៊ីនធឺណិតកាលពីដើមឆ្នាំនេះ ហើយថ្មីៗនេះត្រូវបានប្រព័ន្ធផ្សព្វផ្សាយរកឃើញ។
លោក Vucevic បានប្រាប់ទីភ្នាក់ងារសារព័ត៌មាន Sputnik ថា ប្រទេសស៊ែប៊ីមិនបានលក់ហើយក៏ នឹងមិនលក់អាវុធទៅឱ្យភាគីអ៊ុយក្រែន ឬរុស្ស៊ី ឬប្រទេសជុំវិញជម្លោះនេះដែរ។ “យើងបានបដិសេធចំពោះការកុហកទាំងនេះ ជាងដប់ដងរួចហើយ ហើយនឹងធ្វើវាម្តងទៀត។
រដ្ឋមន្ត្រីក្រសួងការពារជាតិរបស់ប្រទេស ស៊ែប៊ី លោក Milos Vucevic បន្ថែមថា “វាតែងតែមានលទ្ធភាពដែល អាវុធមួយចំនួននឹងត្រូវបានរកឃើញ ដោយមន្តអាគមនៅក្នុងតំបន់ជម្លោះ។ ប៉ុន្តែវាមិនពាក់ព័ន្ធនឹងប្រទេសស៊ែប៊ីទេ»។ «វាជាសំណួរសម្រាប់ប្រទេសដែល មិនគោរពបទដ្ឋានអន្តរជាតិ កាតព្វកិច្ចកិច្ចសន្យា និងការអនុវត្តអាជីវកម្ម» ៕
ប្រែសម្រួលៈ ណៃ តុលា
