បរទេស៖ គណបក្សប្រជាធិបតេយ្យនៅក្នុងសភា និងព្រឹទ្ធសភា របស់សហរដ្ឋអាមេរិក បានណែនាំច្បាប់ដែលនឹងបង្ខំសេតវិមានឱ្យស្វែងរកការយល់ព្រមពីសភា មុនពេលបញ្ជាឱ្យមានការវាយប្រហារ នុយក្លេអ៊ែរណាមួយ ដោយទទូចថាប្រធានាធិបតី មិនគួរមានសិទ្ធិអំណាចឯកតោភាគី ដើម្បីចាប់ផ្តើមសង្គ្រាមនុយក្លេអ៊ែរ នោះទេ។
យោងតាមសារព័ត៌មាន RT ចេញផ្សាយនៅថ្ងៃទី១៥ ខែមេសា ឆ្នាំ២០២៣ បានឱ្យដឹងថា ណែនាំដោយព្រឹទ្ធសមាជិក Ed Markey និងអ្នកតំណាង Ted Lieu កាលពីថ្ងៃសុក្រ ‘ការរឹតបន្តឹងការប្រើប្រាស់អាវុធនុយក្លេអ៊ែរជាលើកដំបូង’ នឹងហាមឃាត់ប្រធានាធិបតីអាមេរិកណាមួយពី “ការចាប់ផ្តើមការវាយប្រហារនុយក្លេអ៊ែរ ដោយគ្មានការអនុញ្ញាតជាមុនពីសភា” ក៏ដូចជាបញ្ជាក់ឡើងវិញនូវអំណាចសង្រ្គាម របស់សមាជិកសភានៅក្រោម រដ្ឋធម្មនុញ្ញសហរដ្ឋអាមេរិក។
សមាជិកព្រឹទ្ធសភា Markey បាននិយាយនៅក្នុងសេចក្តីថ្លែងការណ៍មួយថា “គ្មានប្រធានាធិបតីណាមួយមានសិទ្ធិ ឬសិទ្ធិអំណាចរដ្ឋធម្មនុញ្ញ ដើម្បីប្រកាសសង្គ្រាមជាឯកតោភាគីឡើយ អនុញ្ញាតឱ្យមានការវាយប្រហារ នុយក្លេអ៊ែរជាលើកដំបូង” ខណៈដែលលោក Lieu បានបន្ថែមថា “គ្មាននរណាម្នាក់គួរមានលទ្ធភាពចាប់ផ្តើមសង្រ្គាម ដែលនឹងបញ្ចប់ជីវិតដូចយើងដឹងនោះទេ»។
សមាជិកសភាទាំងពីររូបបានបន្តចោទប្រកាន់ ប្រធានាធិបតីរុស្ស៊ី វ្ល៉ាឌីមៀ ពូទីន ពី “ការគំរាមកំហែងនុយក្លេអ៊ែរ” ដោយលើកហេតុផលថា ហានិភ័យនៃសង្គ្រាមនុយក្លេអ៊ែរ “មិនដែលមានភាពច្បាស់លាស់ជាងនេះ” ចំពេលជម្លោះដែលកំពុងផ្ទុះឡើងនៅអ៊ុយក្រែន។ ទោះជាយ៉ាងណាក៏ដោយ ទីក្រុងម៉ូស្គូបានច្រានចោលការចោទប្រកាន់បែបនេះ ដោយអ្នកនាំពាក្យវិមានក្រឹមឡាំង លោក Dmitry Peskov ថ្មីៗនេះបានថ្លែងថា សហរដ្ឋអាមេរិក និងសម្ព័ន្ធមិត្តរបស់ខ្លួន “ឆាប់មានប្រតិកម្មខ្លាំងពេក” លើប្រធានបទអាវុធនុយក្លេអ៊ែរ៕ ប្រែសម្រួលៈ ណៃ តុលា
