កាធុម៖ ជម្លោះដ៏សាហាវរវាងកងទ័ពស៊ូដង់ និងកងកម្លាំងគាំទ្ររហ័សប៉ារ៉ាយោធា (RSF) នៅក្នុងរដ្ឋធានីកាធុម បានសម្លាប់មនុស្សយ៉ាងហោចណាស់ ៥៦នាក់ និងរបួសជាង ៥៩០ នាក់ ដែលបង្កើនការព្រួយបារម្ភ ជាអន្តរជាតិអំពីការកើនឡើងបន្ថែមទៀត។
មេបញ្ជាការកងទ័ពស៊ូដង់ លោកឧត្តមសេនីយ៍ Abdel Fattah Al-Burhan កាលពីថ្ងៃសៅរ៍បានចេញ សេចក្តីសម្រេចរំលាយកងកម្លាំង គាំទ្ររហ័សប៉ារ៉ាយោធា RSF នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
សេវាស៊ើបការណ៍ទូទៅរបស់ស៊ូដង់ (GIS) បានឲ្យដឹងនៅក្នុងសេចក្តីថ្លែងការណ៍ មួយកាលពីថ្ងៃសៅរ៍ថា “មេបញ្ជាការកងទ័ពក៏បាន សម្រេចចិត្តបញ្ចប់ការចាត់តាំង មន្ត្រីកងទ័ពនៅក្នុងកងកម្លាំងគាំទ្រ យ៉ាងឆាប់រហ័សរបស់ពួកឧទ្ទាម” ហើយលោក Al-Burhan ក៏ជាប្រធានក្រុមប្រឹក្សាអធិបតេយ្យភាព នៃប្រទេសអាហ្វ្រិកផងដែរ។
ទន្ទឹមនឹងនេះ អ្នកនាំពាក្យកងទ័ពស៊ូដង់បានប្រកាសថា ស្ថានភាពសន្តិសុខនៅទីក្រុងកាធុម មានស្ថិរភាព បើទោះជាមានសេចក្តីរាយការណ៍ ពីការប៉ះទង្គិចគ្នាជាបន្តក៏ដោយ ។
ការប្រយុទ្ធគ្នាយ៉ាងសាហាវរវាងកងទ័ព និង RSF បានផ្ទុះឡើងនៅព្រឹកថ្ងៃអាទិត្យ។ គណៈកម្មាធិការវេជ្ជបណ្ឌិតស៊ូដង់ បានឲ្យដឹងនៅព្រឹកថ្ងៃអាទិត្យថា យ៉ាងហោចណាស់មនុស្ស ៥៦នាក់ត្រូវបានសម្លាប់ និងជាង ៥៩៥នាក់បានរងរបួស ដោយកត់សម្គាល់ថា ចំនួនអ្នកស្លាប់ និងរបួសជាច្រើននៅតែ មិនទាន់រាប់បញ្ចូលនៅឡើយ ៕
ប្រែសម្រួល ឈូក បូរ៉ា
