យេរ៉ូសាឡឹម៖ អ៊ីស្រាអែល បានឲ្យដឹងថា ខ្លួនកំពុងព្រួយបារម្ភ ជុំវិញការប្រយុទ្ធគ្នារវាង កងកម្លាំងប្រដាប់អាវុធស៊ូដង់ និងកងកម្លាំងគាំទ្រយ៉ាងរហ័ស នៅក្នុងប្រទេសស៊ូដង់ នេះបើយោងតាមការចុះផ្សាយរបស់ ទីភ្នាក់ងារសារព័ត៌មានចិនស៊ិនហួ។
អ្នកនាំពាក្យក្រសួងការបរទេស អ៊ីស្រាអែលលោក Lior Haiat បានសរសេរនៅលើបណ្ដាញ Twitter ថា “អ៊ីស្រាអែល ចង់បានស្ថិរភាព និងសន្តិសុខសម្រាប់ស៊ូដង់”។
អ្នកនាំពាក្យរូបនេះបានសរសេរថា “អ៊ីស្រាអែលអំពាវនាវឱ្យគ្រប់ភាគីទាំងអស់ ជៀសវាងពីអំពើហិង្សា ហើយត្រឡប់ទៅរកផ្លូវ នៃការផ្សះផ្សាផ្ទៃក្នុងវិញ ដើម្បីបញ្ចប់ដំណើរការនៃការផ្លាស់ប្តូរ រដ្ឋាភិបាលដោយមានការឯកភាពធំ”។
ការប៉ះទង្គិចប្រដាប់អាវុធដែលបាន ផ្ទុះឡើងនៅក្រុងកាធុម កាលពីថ្ងៃសៅរ៍ បានបណ្តាលឲ្យមនុស្សយ៉ាងហោចណាស់ ៩៧នាក់ស្លាប់ និងរាប់រយនាក់ផ្សេងទៀតរងរបួស។
ជម្លោះនេះត្រូវបានគេរំពឹងថា នឹងពន្យារពេលការចុះហត្ថលេខា លើកិច្ចព្រមព្រៀង ដើម្បីធ្វើឱ្យមានទំនាក់ទំនង ធម្មតារវាងអ៊ីស្រាអែល និងស៊ូដង់ ដែលត្រូវបានគេរំពឹងថា នឹងកើតឡើងបន្ទាប់ពីការផ្ទេរអំណាច នៅក្នុងប្រទេសស៊ូដង់ ទៅឱ្យរដ្ឋាភិបាលស៊ីវិល នេះបើយោងតាមអ្នកអត្ថាធិប្បាយ លើព័ត៌មានរដ្ឋ Kan TV ។
ស៊ូដង់ដំបូងបានយល់ព្រមធ្វើឱ្យ មានទំនាក់ទំនងធម្មតាជាមួយ អ៊ីស្រាអែលនៅឆ្នាំ២០២០។ បន្ទាប់ពីបានទៅបំពេញទស្សនកិច្ច នៅរដ្ឋធានីកាធុម នៃប្រទេសស៊ូដង់ក្នុងខែកុម្ភៈ រដ្ឋមន្ត្រីការបរទេសអ៊ីស្រាអែល Eli Cohen បានឲ្យដឹងថា កិច្ចព្រមព្រៀងធ្វើឱ្យប្រក្រតីភាព ចុងក្រោយត្រូវបានគេរំពឹងថា នឹងចុះហត្ថលេខានៅចុងឆ្នាំ២០២៣ ៕
ប្រែសម្រួល ឈូក បូរ៉ា
