បរទេស៖ រដ្ឋមន្ត្រីការបរទេស របស់កោះគ្រប់គ្រងដោយខ្លួនឯង តៃវ៉ាន់ លោក Joseph Wu បានអះអាងថា ជម្លោះយោធារវាងចិន និងតៃវ៉ាន់អាចនឹងកើតឡើងក្នុងឆ្នាំ ២០២៧។
យោងតាមសារព័ត៌មាន RT ចេញផ្សាយនៅថ្ងៃទី២២ ខែមេសា ឆ្នាំ២០២៣ បានឱ្យដឹងថា ដោយបង្ហាញខ្លួននៅលើស្ថានីយ៍វិទ្យុ LBC របស់ចក្រភពអង់គ្លេសកាលពីថ្ងៃព្រហស្បតិ៍លោក Wu បាននិយាយថា “យើងកំពុងទទួលយកការគំរាមកំហែងផ្នែកយោធារបស់ចិនយ៉ាងខ្លាំង … ខ្ញុំគិតថាឆ្នាំ ២០២៧ គឺជាឆ្នាំដែលយើងត្រូវយកចិត្តទុកដាក់យ៉ាងខ្លាំង” ។
លោកបានសម្តែងក្តីសង្ឃឹមថា “ដៃគូដែលមានគំនិតដូចគ្នា ដែលរួមានមានអង់គ្លេសផងដែរ អាចបញ្ឈប់ចិនពីការផ្តើមសង្រ្គាមប្រឆាំងនឹងកោះតៃវ៉ាន់”។
សារព័ត៌មាន Reuters បានលាតត្រដាងកាលពីខែមុនថា រដ្ឋាភិបាលអង់គ្លេស បានអនុម័តការកើនឡើងគួរឱ្យកត់សម្គាល់ ក្នុងការនាំចេញគ្រឿងបន្លាស់ និងបច្ចេកវិទ្យានាវាមុជទឹកទៅកាន់កោះតៃវ៉ាន់ក្នុងឆ្នាំ ២០២២។ វាបានធ្វើតាមការអំពាវនាវរបស់អតីតនាយករដ្ឋមន្ត្រី Liz Truss សម្រាប់ “អង្គការណាតូជាសកល” ដើម្បីផ្តល់អាវុធដល់ក្រុងតៃប៉ិតាមរបៀបសម្ព័ន្ធភាព បានបំពាក់អាវុធក្រុងកៀវ។
ការវាយតម្លៃរបស់ Wu អំពីទំនាក់ទំនងចិន-តៃវ៉ាន់បានបន្លឺឡើងដែលគូសបញ្ជាក់ដោយនាយក CIA លោក William Burns ក្នុងខែកុម្ភៈ។
ដោយមានវត្តមាននៅលើកញ្ចក់ទូរទស្សន៍ CBS’ Face the Nation លោកបានអះអាងថា “ប្រធានាធិបតីចិន Xi បានណែនាំកងទ័ពប្រជាជនចិន PLA ដែលជាថ្នាក់ដឹកនាំយោធាចិន ឱ្យត្រៀមខ្លួននៅឆ្នាំ ២០២៧ ដើម្បីឈ្លានពានកោះតៃវ៉ាន់” ។ ទោះជាយ៉ាងណាក៏ដោយ លោកបានបន្ថែមថា នេះមិនមែនមានន័យថាទីក្រុងប៉េកាំងបាន “សម្រេចចិត្តឈ្លានពាននៅឆ្នាំ ២០២៧ ឬឆ្នាំណាមួយផ្សេងទៀតនោះទេ” ៕
ប្រែសម្រួលៈ ណៃ តុលា
