គៀវ ៖ អ៊ុយក្រែន បានថ្កោលទោស អ្វីដែលខ្លួនហៅថាការអត្ថាធិប្បាយ មិនសមហេតុសមផលរបស់ឯកអគ្គរដ្ឋទូតចិន ប្រចាំប្រទេសបារាំង ដែលចោទសួរអំពីអធិបតេយ្យភាពរបស់អតីតប្រទេសសូវៀត ។
ប្រទេសបារាំង និងរដ្ឋបាល់ទិក អេស្តូនី ឡាតវី និងលីទុយអានី ក៏បានសម្តែងការខកចិត្ត ចំពោះការលើកឡើងនេះដែរ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
នៅពេលសួរអំពីជំហរ របស់លោកថាតើ គ្រីមៀ ជាផ្នែកមួយនៃអ៊ុយក្រែន ឬយ៉ាងណា ឯកអគ្គរដ្ឋទូតចិនលោក Lu Shaye បានឲ្យដឹងនៅក្នុងបទ សម្ភាសន៍មួយ ដែលបានចាក់ផ្សាយលើកញ្ចក់ទូរទស្សន៍បារាំង កាលពីថ្ងៃសុក្រថា ជាប្រវត្តិសាស្ត្រ ឧបទ្វីបគឺជាផ្នែកមួយនៃប្រទេសរុស្ស៊ី ហើយត្រូវបានផ្តល់ជូនដល់ អ៊ុយក្រែន ដោយអតីតមេដឹកនាំសូវៀត Nikita Khrushchev ។
លោក Shaye បានលើកឡើងថា “បណ្តាប្រទេសអតីតសហភាពសូវៀតទាំងនេះមិនមានឋានៈពិតប្រាកដនៅក្នុងច្បាប់អន្តរជាតិនោះទេ ពីព្រោះមិនមានកិច្ចព្រមព្រៀងអន្តរជាតិ ដើម្បីសម្រេចបាននូវឋានៈអធិបតេយ្យភាពរបស់ពួកគេ” ។
ការអត្ថាធិប្បាយរបស់លោក មិនត្រឹមតែសំដៅទៅលើអ៊ុយក្រែន ដែលរុស្ស៊ីបានឈ្លានពានកាលពីខែកុម្ភៈឆ្នាំមុនប៉ុណ្ណោះទេ ថែមទាំងសំដៅទៅលើអតីត សាធារណរដ្ឋសូវៀតទាំងអស់ ដែលបានលេចចេញជាប្រទេសឯករាជ្យ បន្ទាប់ពីការដួលរលំនៃសហភាពសូវៀតក្នុងឆ្នាំ១៩៩១ រួមទាំងសមាជិកជាច្រើន នៃសហភាពអឺរ៉ុបផងដែរ។
ឆ្លើយតបកាលពីថ្ងៃអាទិត្យ ជំនួយការប្រធានាធិបតី អ៊ុយក្រែន លោក Mykhaylo Podolyak បានលើកឡើងថា ស្ថានភាពនៃបណ្តាប្រទេស ក្រោយសហភាពសូវៀត “ត្រូវបានចែងនៅក្នុងច្បាប់អន្តរជាតិ”។
លោក Podolyak បាននិយាយដោយសំដៅទៅប្រទេសចិនថា “វាជារឿងចម្លែកដែលបានឮកំណែមិនសមហេតុផលនៃ ‘ប្រវត្តិសាស្ត្រគ្រីមៀ’ ពីតំណាងប្រទេសមួយ ដែលមិនច្បាស់លាស់អំពីប្រវត្តិសាស្ត្រ ១០០០ឆ្នាំរបស់ខ្លួន៕
ប្រែសម្រួល ឈូក បូរ៉ា
