បរទេស៖ ប្រធានាធិបតីចិន លោក Xi Jinping បានដើរតួនាទីយ៉ាងសំខាន់ ក្នុងការជួយបញ្ចុះបញ្ចូលមេដឹកនាំ នៃប្រទេសអារ៉ាប៊ីសាអូឌីត និងអ៊ីរ៉ង់ ឱ្យស្តារទំនាក់ទំនងឡើងវិញ និងបញ្ចប់ជម្លោះការទូត រយៈពេលប្រាំពីរឆ្នាំរបស់ពួកគេ , នេះបើតាមការទូតជាន់ខ្ពស់ របស់ទីក្រុងប៉េកាំងបានប្រាប់កាសែត People’s Daily កាលពីថ្ងៃសៅរ៍។
យោងតាមសារព័ត៌មាន RT ចេញផ្សាយនៅថ្ងៃទី៣០ ខែមេសា ឆ្នាំ២០២៣ បានឱ្យដឹងថា ប្រធាននាយកដ្ឋានកិច្ចការអាស៊ីខាងលិច និងអាហ្វ្រិកខាងជើង នៃក្រសួងការបរទេសចិន លោក Wang Di បានប្រាប់កាសែត ដែលទាក់ទងជាមួយរដ្ឋាភិបាលថា លោក Xi “បានបញ្ចុះបញ្ចូលដោយផ្ទាល់មេដឹកនាំ នៃប្រទេសទាំងពីរ និងគាំទ្រអារ៉ាប៊ីសាអូឌីត និងអ៊ីរ៉ង់ ឱ្យបង្កើតទំនាក់ទំនងមិត្តភាព ជាអ្នកជិតខាងនឹងគ្នា”។
លោក Wang បានបន្ថែមថា កិច្ចខិតខំប្រឹងប្រែងរបស់ទីក្រុងប៉េកាំង ក្នុងការលើកកម្ពស់ស្ថិរភាព ក្នុងតំបន់នៅមជ្ឈិមបូព៌ាកើតឡើង ចំពេលដែល “ប្រទេសធំៗមួយចំនួននៅខាងក្រៅតំបន់ ដែលបង្កឱ្យមានអស្ថិរភាពរយៈពេលវែង” សម្រាប់អ្វីដែលគាត់បានពិពណ៌នាថាជា “ផលប្រយោជន៍ផ្ទាល់ខ្លួន” របស់ប្រទេសទាំងពីរ។ លោកក៏បានចង្អុលបង្ហាញថា ទីក្រុងប៉េកាំងនឹងក្លាយជា “អ្នកសម្របសម្រួលដោយយុត្តិធម៌” ហើយថា ខ្លួននឹងបន្តជា “អ្នកលើកកម្ពស់សន្តិភាព និងស្ថិរភាពនៅមជ្ឈិមបូព៌ា”។
កិច្ចពិភាក្សារវាងទីក្រុងតេអេរ៉ង់ និងទីក្រុងរីយ៉ាដ មានភាពគួរឱ្យកត់សម្គាល់ដែលថា សហរដ្ឋអាមេរិកមិនជាប់ពាក់ព័ន្ធ ទោះបីជាបានដើរតួជាអ្នកការទូតដ៏សំខាន់ នៅក្នុងតំបន់អស់រយៈពេល ៧៥ឆ្នាំក៏ដោយ។
កិច្ចព្រមព្រៀងក្រុងប៉េកាំង កាលពីខែមុនរវាងអារ៉ាប៊ីសាអូឌីត និងអ៊ីរ៉ង់ ត្រូវបានប្រកាសថា ជាការឈ្នះគោលនយោបាយការបរទេសដ៏សំខាន់ សម្រាប់ប្រទេសចិន។
វាក៏នាំឱ្យព្រះរាជាណាចក្រមួយនេះ ចាប់ផ្តើមការចរចាសន្តិភាពដែលរៀបចំឡើង ដើម្បីបញ្ចប់ជម្លោះរយៈពេលប្រាំបីឆ្នាំនៅក្នុងប្រទេសយេម៉ែន។ វាក៏បានបង្ហាញសញ្ញាថា «ភាពជឿជាក់ខាងការទូត» របស់ទីក្រុងប៉េកាំងក្នុងតំបន់កំពុងទទួលបានជំហររឹងមាំ ជាមួយនឹងឥទ្ធិពលសេដ្ឋកិច្ចរបស់ខ្លួន, នេះបើយោងតាមការចុះផ្សាយ របស់សារព័ត៌មាន South China Morning Post ដែលមានមូលដ្ឋាននៅទីក្រុងវ៉ាស៊ីនតោន៕ ប្រែសម្រួលៈ ណៃ តុលា
