ប៉េកាំង៖ ប្រទេសចិន បានសម្តែងការមិនពេញចិត្តយ៉ាងខ្លាំង និងការប្រឆាំងយ៉ាងម៉ឺងម៉ាត់ ចំពោះការបង្កាច់បង្ខូចដ៏អាក្រក់របស់នាយករដ្ឋមន្ត្រីកាណាដាលោក Justin Trudeau ជុំវិញកំណត់ត្រាសិទ្ធិមនុស្សរបស់ប្រទេសចិន ក្នុងអំឡុងពេលទស្សនកិច្ចរបស់លោក នៅសហរដ្ឋអាមេរិក ជាកន្លែងដែលលោកបាននិយាយបញ្ឆិតបញ្ឆៀងថា ការផលិតលីចូមរបស់ចិន ប្រើប្រាស់អ្វីដែលគេហៅថាពលកម្មទាសករ ដែលជាការចោទប្រកាន់គ្មានមូលដ្ឋានទាំងស្រុង។
អ្នកនាំពាក្យស្ថានទូតចិន ប្រចាំនៅកាណាដាកាលពីថ្ងៃសៅរ៍ ដោយសង្កត់ធ្ងន់ថា អ្វីដែលគេហៅថា ពលកម្មបង្ខំមិនមាននៅក្នុងប្រទេសចិននោះទេ ប៉ុន្តែមាននៅក្នុងសហរដ្ឋអាមេរិក កាណាដា និងប្រទេសលោកខាងលិចមួយចំនួនទៀត។
ការប្រឆាំងយ៉ាងខ្លាំងរបស់ស្ថានទូតចិន កើតចេញពីយុទ្ធនាការលាបពណ៌របស់លោក Trudeau នៅក្នុងសុន្ទរកថានៅឯក្រុមប្រឹក្សាទំនាក់ទំនងបរទេសនៅទីក្រុងញូវយ៉ក កាលពីថ្ងៃសុក្រ ដែលលោកបានស្នើដោយមិនផ្តល់ភស្តុតាងណាមួយថាសមត្ថភាពរបស់ប្រទេសចិន ក្នុងការក្លាយជាប្រទេសផលិតលីចូមដ៏ធំបំផុតរបស់ពិភពលោកត្រូវបានផ្សារភ្ជាប់ទៅនឹង “ទាសករពលកម្ម”។
អ្នកនាំពាក្យស្ថានទូតបានលើកឡើងថា “ការប៉ុនប៉ងរបស់អ្នកនយោបាយកាណាដា ដើម្បីភ្ជាប់ការផលិតលីចូមរបស់ចិនជាមួយ ‘ទាសករពលកម្ម’ គឺជាឧបាយកលនយោបាយ និងការសម្លុតសេដ្ឋកិច្ចក្រោមរូបភាពនៃសិទ្ធិមនុស្ស ក្នុងគោលបំណងបំផ្លាញភាពរុងរឿង និងស្ថិរភាពរបស់ប្រទេសចិន និងទប់ស្កាត់ការអភិវឌ្ឍន៍របស់ប្រទេសចិន។
សុន្ទរកថារបស់អ្នកនយោបាយកាណាដា ដែលមិនពាក់ព័ន្ធនឹងប្រទេសចិន គឺគ្មានអ្វីក្រៅពីចោរដែលស្រែកថា ‘បញ្ឈប់ចោរ’។ អ្នកនាំពាក្យរូបនេះបានចង្អុលបង្ហាញថា ការចោទប្រកាន់មិនសមហេតុផលដូចជា “ទាសករពលកម្ម” និង “ពលកម្មដោយបង្ខំ” គឺជាការឆ្លុះបញ្ចាំងទាំងស្រុងពីពិរុទ្ធភាពរបស់សហរដ្ឋអាមេរិក កាណាដា និងបណ្តាប្រទេសលោកខាងលិចមួយចំនួនទៀត។
ស្ថានទូតចិនប្រចាំប្រទេសកាណាដាបានបង្ហាញថា ចាប់ពីឆ្នាំ ១៥២៥ ដល់ឆ្នាំ១៨៦៦ ជនជាតិអាហ្វ្រិកជាង ១២,៥ លាននាក់ត្រូវបានជួញដូរទៅកាន់ទ្វីបអាមេរិក ដើម្បីចូលរួមក្នុងការងារដោយបង្ខំ។ សព្វថ្ងៃនេះ សហរដ្ឋអាមេរិក នៅតែជាមជ្ឈមណ្ឌលគ្រោះមហន្តរាយដ៏សំខាន់នៃពលកម្មដោយបង្ខំ។ ស្ថាប័នសិក្សានៅសហរដ្ឋអាមេរិក បានរាយការណ៍ថាបច្ចុប្បន្នមានមនុស្សជាង ៥០០០០០ នាក់ រស់នៅក្នុងទាសភាពសម័យទំនើបនៅក្នុងសហរដ្ឋអាមេរិក។
ប្រទេសកាណាដា មិនប្រសើរជាងនេះទេ ដោយសារជនជាតិស្បែកខ្មៅ និងជនជាតិដើមភាគតិចជាច្រើនត្រូវបានបង្ខំឱ្យធ្វើជាទាសករក្នុងប្រទេសកាលពីសតវត្សកន្លងមក ទីក្រុងខ្លះថែមទាំងបានដំណើរការដេញថ្លៃទាសករទៀតផង។
អ្នកនាំពាក្យរូបនេះបានបន្ដថា ក្នុងពេលជាមួយគ្នានោះ ការបៀតបៀនកុមារជនជាតិដើមភាគតិច ការរើសអើងជាតិសាសន៍ជាប្រព័ន្ធ ការប្រឆាំងនឹងមូស្លីម ប្រឆាំងនឹងអាហ្វ្រិក ប្រឆាំងនឹងអាស៊ី និងការរើសអើងសាសនា និងពូជសាសន៍ផ្សេងទៀត គឺកើតមានជាញឹកញាប់នៅក្នុងប្រទេសកាណាដា។
ប្រឈមមុខនឹងសកម្មភាព និងឧក្រិដ្ឋកម្មដ៏គួរឱ្យអាម៉ាស់ទាំងនេះ អ្នកនយោបាយកាណាដាបានបិទភ្នែកមើលបញ្ហាសិទ្ធិមនុស្សធ្ងន់ធ្ងររបស់ពួកគេ ខណៈពេលដែលកំពុងដើរតួជា “អ្នកអធិប្បាយសិទ្ធិមនុស្ស” ដោយសាទរ ដោយចង្អុលថាកាណាដាមិនមានតួនាទីធ្វើអត្ថាធិប្បាយលើស្ថានភាពសិទ្ធិមនុស្សនៅក្នុងប្រទេសចិន នោះទេ៕ប្រែសម្រួល ឈូក បូរ៉ា
