អង់ការ៉ា៖ ប្រធានាធិបតីតួកគីលោក Recep Tayyip Erdogan ត្រូវបានប្រកាសថា ជាអ្នកឈ្នះការបោះឆ្នោតប្រធានាធិបតី កាលពីថ្ងៃអាទិត្យ ដោយលោកនឹងត្រូវបន្ដកាន់តំណែងរយៈពេល ៥ឆ្នាំទៀត នេះបើយោងតាមការចុះផ្សាយ របស់ទីភ្នាក់ងារសារ ព័ត៌មានចិនស៊ិនហួ។
យោងតាមលទ្ធផលបោះឆ្នោតបឋម លោក Erdogan ត្រូវបានជាប់ឆ្នោតជាថ្មី ដោយទទួលបានសំឡេងគាំទ្រ ៥២,១៤ ភាគរយនៅក្នុងការបោះឆ្នោត ប្រធានាធិបតីតួកគី នេះបើយោងតាមលោក Ahmet Yener បានប្រាប់អ្នកយកព័ត៌មាន នៅក្នុងរដ្ឋធានីអង់ការ៉ា កាលពីល្ងាចថ្ងៃអាទិត្យ។
លោក Yener បានលើកឡើងថា គូប្រជែងរបស់លោកគឺ លោក Kemal Kilicdaroglu អាយុ ៧៤ឆ្នាំ ទទួលបាន ៤៧,៨៦ ភាគរយ នៃសន្លឹកឆ្នោត។ លោកបានបន្ដថា ប្រអប់សន្លឹកឆ្នោតចំនួន ១៩៦,៧៤៤ ឬ ៩៩,៤៣ ភាគរយនៃចំនួនសរុបត្រូវបានបើក។
លោក Erdogan បានប្រាប់អ្នកគាំទ្រដ៏ត្រេកអររបស់លោក ពីលើរថយន្តក្រុងក្នុងស្រុកកំណើតរបស់លោក ក្នុងទីក្រុងអ៊ីស្ដង់ប៊ុលថា “យើងបានបញ្ចប់ការបោះឆ្នោត ប្រធានាធិបតីជុំទីពីរ ដោយការពេញចិត្ត របស់ប្រជាជាតិរបស់យើង”។
ការបរាជ័យក្នុងការបង្កើតអ្នកឈ្នះ នៅក្នុងជុំទីមួយនៅថ្ងៃទី១៤ ខែឧសភា បានធ្វើឱ្យប្រទេសនេះចូលទៅក្នុងការបោះឆ្នោត ប្រធានាធិបតីជាលើកដំបូង ដែលមិនធ្លាប់មាន។ លោក Erdogan ដែលមានអាយុ ៦៩ ឆ្នាំដែលមិនធ្លាប់ចាញ់ការបោះឆ្នោត និងបានកាន់អំណាច តាំងពីឆ្នាំ២០០៣ បានប្រឈមមុខ នឹងការប្រឆាំងដ៏រឹងមាំ និងរួបរួមជាងពេលមុនៗ។
លោក Kilicdaroglu ដែលគាំទ្រដោយប្លុក នៃគណបក្សប្រឆាំង បានប្តេជ្ញាថា នឹងប្រគល់ប្រទេសតួកគី ទៅកាន់លទ្ធិប្រជាធិបតេយ្យ ក្នុងសភាជាមួយនឹងការត្រួតពិនិត្យ និងតុល្យភាពដ៏រឹងមាំ។
លោក Erdogan បានធ្វើបានល្អជាងការស្ទង់មតិយោបល់ ដែលបានព្យាករណ៍ ដោយទទួលបាន ៤៩,៥២ ភាគរយ នៃការបោះឆ្នោតខណៈ លោក Kilicdaroglu ទទួលបាន ៤៤,៨៨ភាគរយ នៅថ្ងៃទី១៤ ខែឧសភា។
ក្នុងរយៈពេលពីរសប្តាហ៍ចុងក្រោយនេះ បេក្ខជនទាំងពីរបានផ្តោតលើ ការអំពាវនាវឱ្យមានការបោះឆ្នោតជាតិនិយម នៅក្នុងយុទ្ធនាការរបស់ពួកគេ។ ពួកគេទាំងពីរ បានសន្យាដោះស្រាយ បញ្ហាទាក់ទងនឹងបញ្ហាជនភៀសខ្លួន និងបានប្តេជ្ញា បញ្ចប់អំពើភេរវកម្ម ខណៈដែលលទ្ធផលថ្ងៃទី១៤ ឧសភា បង្ហាញពីការកើនឡើង នៃការគាំទ្រ សម្រាប់គណបក្សជាតិនិយម។
លោក Erdogan សន្យាថានឹងបង្កើត “សតវត្សតួកគី” ថ្មី ប្រសិនបើលោកជាប់ឆ្នោតឡើងវិញ។ លោកក៏បានសង្កត់ធ្ងន់ផងដែរថា តំណែងប្រធានាធិបតីរបស់លោក គឺចាំបាច់សម្រាប់ភាពសុខដុមរមនា ក្នុងចំណោមស្ថាប័នរដ្ឋ និងស្ថិរភាពក្នុងប្រទេស ខណៈដែលសម្ព័ន្ធភាពរបស់លោក កាន់សំឡេងភាគច្រើននៅក្នុងសភា៕ ប្រែសម្រួល ឈូក បូរ៉ា
