ឡូសអេមជឺឡេស៖ លោក Dunson Cheng ប្រធានប្រតិបត្តិនៃធនាគារ Cathay Bank បានឲ្យដឹងនៅក្នុងបទសម្ភាសន៍ថ្មីៗនេះជាមួយកាសែតស៊ិនហួ ថា រលកនៃការបិទធនាគាររបស់សហរដ្ឋអាមេរិក នាពេលថ្មីៗនេះបានបន្សល់ទុកនូវភាពទន់ខ្សោយរបស់ធនាគារក្នុងតំបន់មួយចំនួនទៀត។
ការដួលរលំភ្លាមៗនៃធនាគារ Silicon Valley Bank, Signature Bank និង First Republic Bank នៅសហរដ្ឋអាមេរិក កាលពីដើមឆ្នាំនេះបានធ្វើឱ្យមានការបារម្ភថ្មីៗកានលតែខ្លាំង អំពីសុវត្ថិភាពនៃប្រព័ន្ធធនាគារ។
ភាគហ៊ុនរបស់ធនាគារ ក្នុងតំបន់របស់សហរដ្ឋអាមេរិក បានបន្តធ្លាក់ចុះក្នុងខែឧសភាដោយមាន PacWest នាំមុខគេ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោកបានលើកឡើងថា “ខ្ញុំជឿថាវិបត្តិនេះបានចោទជាសំណួរថាតើធនាគារមួយចំនួន ដែលមានដើមទុនតិច និងប្រាក់ចំណេញតិចនឹងចង់បន្តអាជីវកម្ម។ ធនាគារទាំងនេះជាច្រើនអាចសម្រេចចិត្តរួមបញ្ចូលគ្នា ឬលក់ទៅឱ្យធនាគារដែលខ្លាំងជាង ដូច្នេះចំនួនធនាគារនៅក្នុងអាមេរិក និងរដ្ឋមួយចំនួនទៀតនឹងបន្តធ្លាក់ចុះ។
លោក Cheng បានបន្ដថា មានធនាគារប្រហែល ១៥០០០ធនាគារ នៅក្នុងប្រទេសនេះ នៅពេលដែលលោកចាប់ផ្តើមអាជីពធនាគារ របស់លោកនៅដើមទសវត្សរ៍ឆ្នាំ១៩៨០ ហើយឥឡូវនេះចំនួនបានធ្លាក់ចុះ មកនៅត្រឹមប្រហែល ៤៣០០ធនាគារប៉ុណ្ណោះ។
នៅក្នុងនោះដែរ និយតករធនាគាររបស់សហរដ្ឋអាមេរិក បានចាត់វិធានការ ដើម្បីដោះស្រាយការដួលរលំនៃធនាគារក្នុងតំបន់ដោយផ្តោត លើអ្នកដាក់ប្រាក់បញ្ញើ។
លោក Cheng បានកត់សម្គាល់ថា មានហានិភ័យជាច្រើនដែលប្រឈមមុខនឹងធនាគារក្នុងតំបន់ រួមទាំងការរង្គោះរង្គើនៃទំនុកចិត្តរបស់អតិថិជននៅក្នុងធនាគារក្នុងតំបន់។ ការព្រួយបារម្ភអំពីថាតើការធ្លាក់ចុះនាពេលបច្ចុប្បន្ន នៅក្នុងសេដ្ឋកិច្ចអាមេរិកនឹងវិវត្តទៅជាវិបត្តិសេដ្ឋកិច្ចពេញលេញឬយ៉ាងណា និងផលប៉ះពាល់យ៉ាងសំខាន់នៃការជឿនលឿន នៃបច្ចេកវិជ្ជាយ៉ាងលឿនលើវិស័យធនាគារ។
អតិថិជនចាប់ផ្តើមសួរថាតើលុយ របស់ពួកគេមានសុវត្ថិភាពនៅធនាគាររបស់ពួកគេដែរឬទេ។ លោកបានពន្យល់ថា ដូច្នេះវានឹងត្រូវការពេលវេលាសម្រាប់ធនាគារ ដើម្បីទទួលបានទំនុកចិត្តពីអតិថិជនឡើងវិញ។
បន្ទាប់ពីការបិទធនាគារនាពេលថ្មីៗនេះ និយតកររបស់សហរដ្ឋអាមេរិក កំពុងធ្វើការ ដើម្បីការពារផលប្រយោជន៍របស់អ្នកដាក់ប្រាក់បញ្ញើ និងធានាថាតម្រូវការរបស់ពួកគេត្រូវបានបំពេញ បើទោះបីជាធនាគាររបស់ពួកគេ បិទទ្វារក៏ដោយ៕
