បរទេស៖ អគ្គស្នងការនគរបាលជាតិរបស់ថៃគឺ ឧត្តមសេនីយ៍ Damrongsak Kittiprapas បានបញ្ជាឱ្យមន្ត្រីទូទាំងប្រទេសអនុវត្តច្បាប់លើរថយន្តដឹកទំនិញលើសទម្ងន់កំណត់ បន្ទាប់ពីមានព័ត៌មានបានផ្សាយកាលពីសប្តាហ៍មុនថា អ្នកបើកបររថយន្តទាំងនោះបានបង់ប្រាក់ “សំណូក” ។
យោងតាមសារព័ត៌មានថៃ បាងកក ប៉ុស្តិ៍ ចេញផ្សាយនៅថ្ងៃទី៤ ខែមិថុនា ឆ្នាំ២០២៣ បានឱ្យដឹងថា រឿងអាស្រូវសំណូកស្ទីគ័រ បានលេចចេញឡើងបន្ទាប់ពីលោក Wiroj Lakkhanaadisorn សមាជិកសភាក្នុងបញ្ជីគណបក្ស Move Forward ដែលជាប់ឆ្នោតបាននិយាយថា រថយន្តដឹកលើសទម្ងន់ដែលមានស្ទីគ័រពិសេស មិនត្រូវបានឃាត់ទុកទេ ហើយអ្នកបើកបររថយន្តក៏មិន ត្រូវបានចាប់ខ្លួននោះដែរ។
កាលពីម្សិលមិញ លោកឧត្តមសេនីយ៍ Damrongsak បានចុះហត្ថលេខាលើអនុស្សរណៈជាមួយស្នងការរង អគ្គស្នងការ ខាងអធិការកិច្ច និងស្នងការនគរបាលខេត្ត ដើម្បីធានាដល់សាធារណជនថា វិធានការនានាកំពុងត្រូវបានចាត់វិធានការដើម្បីដោះស្រាយបញ្ហានេះ។
អនុស្សរណៈនេះបាននិយាយថា ប៉ុស្តិ៍ត្រួតពិនិត្យបន្ថែមទៀតនឹងត្រូវបង្កើតឡើង ដើម្បីចាត់វិធានការប្រឆាំងនឹងរថយន្តដឹកទំនិញលើសទម្ងន់ និងសកម្មភាពខុសច្បាប់ផ្សេងទៀត ដូចជារថយន្តដឹកទំនិញដែលបង្កសំឡេងខ្លាំង ឬបញ្ចេញផ្សែងខ្មៅ។
អនុស្សរណៈនេះក៏បានប្រាប់មន្ត្រីកុំឲ្យទទួលឬសូកប៉ាន់ណា មួយពីអ្នកបើករថយន្តដឹកទំនិញ។ មន្ត្រីទាំងឡាយណា ដែលត្រូវបានគេរកឃើញថាជាប់ពាក់ព័ន្ធនឹងរឿងអាស្រូវ នឹងត្រូវប្រឈមមុខនឹងការផ្ដន្ទាទោសទាំងផ្លូវច្បាប់ និងវិន័យ។
លោក Wiroj និងប្រធានសមាគមដឹកជញ្ជូនផ្លូវគោកនៃប្រទេសថៃ នឹងត្រូវបានអញ្ជើញឱ្យចូលដើម្បីផ្តល់ព័ត៌មានលម្អិតបន្ថែមទាក់ទងនឹងបញ្ហានេះនៅសប្តាហ៍ក្រោយនេះ, នេះបើតាម ប្រធានអធិការកិច្ចប៉ូលីសលោក Wissanu Prasartthong-osod បាននិយាយ៕
ប្រែសម្រួលៈ ណៃ តុលា
![](https://dap-news.com/wp-content/uploads/2020/08/1-1.png)