លោកឧត្តមសេនីយ៍ សេរីពិសុត តាំមេយ៉ាវ (Sereepisuth Temeeyaves) មេដឹកនាំគណបក្ស សេរីរួមថៃ ដែលជាសមាជិក នៃសម្ព័ន្ធអនាគតដឹកនាំដោយគណបក្ស មូ ហ្វ វ៉ើដ (MFP) បានធានា ដល់ព្រឹទ្ធសភាថា លោកនឹងមិនអនុញ្ញាត ឱ្យធ្វើវិសោធនកម្មច្បាប់ ស្តីពីការប្រមាថព្រះមហាក្សត្រឡើយ តាមអ្វីដែលគេមើលឃើញជាការប៉ុនប៉ង ដើម្បីគាំទ្រមុនការបោះឆ្នោត នាយករដ្ឋមន្ត្រី។
យោងតាមសារព័ត៌មានថៃ បាងកកប៉ុស្តិ៍ ចេញផ្សាយ នៅថ្ងៃទី៥ ខែមិថុនា ឆ្នាំ២០២៣ បានឱ្យដឹងថា ឧត្តមសេនីយ៍ សេរី ពិសុត បានសម្រាលក្តីបារម្ភ អំពីការប៉ុនប៉ងណាមួយ ដើម្បីកែប្រែមាត្រា ១១២ នៃក្រមព្រហ្មទណ្ឌ បន្ទាប់ពី គណបក្ស មូវ ហ្វ វ៉ើដ និងដៃគូចំនួនប្រាំពីររបស់ខ្លួន បានចុះហត្ថលេខាលើ អនុស្សរណៈយោគយល់គ្នាលើវេទិកា គោលនយោបាយរួមមួយកាលពីថ្ងៃទី ២២ ឧសភា ។
លោកឧត្តមសេនីយ៍ សេរី ពិសុត បានថ្លែងថា «វិសោធនកម្មមាត្រា ១១២ មិនត្រូវបានបញ្ចូលក្នុងអនុស្សរណៈនៃការយោគយល់គ្នានោះទេ។
លោកបានចង្អុលបង្ហាញថា សមាជិកព្រឹទ្ធសភាជាច្រើនបាននិយាយថា ពួកគេនឹងមិនបោះឆ្នោតឱ្យមេដឹកនាំ មូវ ហ្វ វ៉ើដ និងបេក្ខជននាយករដ្ឋមន្ត្រី លោក ពីតា លឹមចារឿនរ៉ាត់ នោះទេ ដរាបណាគណបក្សនេះនៅតែចង់ធ្វើវិសោធនកម្មមាត្រា ១១២ ។
លោកបាននិយាយថា “ខ្ញុំនឹងមិនអនុញ្ញាតឱ្យគណបក្ស មូវ ហ្វ វ៉ើដ ធ្វើវិសោធនកម្មច្បាប់នេះទេ។ ភាគីផ្សេងទៀតដែលជាដៃគូនៃសម្ព័ន្ធអនាគត ដូចជា គណបក្ស ប្រាឆាឆាត់ និងគណបក្សភឿថៃ ក៏បានជំទាស់នឹងការប៉ុនប៉ងការកែប្រែនេះដែរ។ ដូច្នេះសមាជិកព្រឹទ្ធសភាមិនគួរព្រួយបារម្ភទេ ព្រោះពួកគេអាចបោះឆ្នោត ជ្រើសរើសបេក្ខជននាយករដ្ឋមន្ត្រីដោយទំនុកចិត្ត»។
នៅក្រោមរដ្ឋធម្មនុញ្ញ សមាជិកព្រឹទ្ធសភាចំនួន ២៥០រូប ដែលត្រូវបានតែងតាំង ដោយវិស្វកររដ្ឋប្រហារ ដែលមិនទាន់បានចូលនិវត្តន៍ គឺក្រុមប្រឹក្សាជាតិដើម្បីសន្តិភាព និងសណ្តាប់ធ្នាប់ ត្រូវបានអនុញ្ញាត ឱ្យចូលរួមសមាជិកសភា ក្នុងការបោះឆ្នោតជ្រើសរើស នាយករដ្ឋមន្ត្រីនៅក្នុងសភា។ គណបក្ស មូវ ហ្វ វ៉ើដ បាននិយាយថា ខ្លួនបានរៀបចំខ្លួនដើម្បីតែម្នាក់ឯង ក្នុងការស្វែងរកការបោះឆ្នោតសម្រាប់ការ ផ្លាស់ប្តូរមាត្រា ១១២។
ទន្ទឹមនឹងនេះ មេដឹកនាំគណបក្ស ប្រជាធិបតេយ្យស្តីទី លោក ជូរិន ឡាក់សាណាវិសិត កាលពីថ្ងៃអាទិត្យ បានអត្ថាធិប្បាយលើពាក្យ បណ្តឹងប្រឆាំងនឹងសមាជិកសភា ដែលជាប់ឆ្នោតក្នុងមណ្ឌលចំនួន ២៥ ដូចដែលបានប្រកាស ដោយគណៈកម្មាធិការរៀបចំការបោះឆ្នោត (EC) ដោយនិយាយថា លោកជឿជាក់ថា នេះនឹងមិនប៉ះពាល់ដល់ការប៉ុនប៉ង ដោយក្រុមចម្រុះដឹកនាំដោយគណបក្ស មូវ ហ្វ វ៉ើដ ដើម្បីបង្កើតរដ្ឋាភិបាលនោះទេ ៕
