គៀវ៖ ការបំផ្លិចបំផ្លាញទំនប់ Nova Kakhovka នៅភាគខាងត្បូងអ៊ុយក្រែន អាចរារាំងការផ្គត់ផ្គង់ទឹកសាបដល់តំបន់គ្រីមៀ ដែលកាន់កាប់ដោយរុស្ស៊ី ដែលជាធាតុផ្សំសំខាន់នៃការកាន់កាប់របស់ទីក្រុងមូស្គូ នៅលើឧបទ្វីប ដែលជាអាទិភាព សម្រាប់ប្រធានាធិបតីរុស្ស៊ីលោក វ្ល៉ាឌីមៀ ពូទីន នៅក្នុងថ្ងៃបើកដំណើរការពេញលេញ នៃការលុកលុយអ៊ុយក្រែនកាលពីខែកុម្ភៈ ឆ្នាំ២០២២។
ទំនប់នេះលាតសន្ធឹងលើទន្លេ Dnieper ដែលបច្ចុប្បន្នជាផ្នែកមួយនៃជួរមុខរវាងកងកម្លាំងអ៊ុយក្រែន នៅច្រាំងខាងលិចរបស់ខ្លួន និងរុស្ស៊ី នៅភាគខាងកើតនៃទន្លេ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Newsweek។
ទំនប់ Nova Kakhovka ដែលជាអាងស្តុកទឹក Kakhovka តភ្ជាប់ និងរោងចក្រថាមពលនុយក្លេអ៊ែរ Zaporizhzhia (ZNPP) គឺជាទីតាំងរសើប ដែលគ្រប់គ្រងដោយរុស្ស៊ីនៅតាមបណ្តោយព្រំដែនទន្លេ ដែលត្រូវបានគេចាត់ទុកថា ជាទីតាំងសក្តានុពល សម្រាប់ការវាយលុកនៅនិទាឃរដូវ-រដូវក្តៅ ដែលបានគ្រោងទុករបស់ទីក្រុងគៀវ។
បន្ទាប់ពីការបំផ្លិចបំផ្លាញទំនប់ Nova Kakhovka នៅភាគខាងត្បូងប្រទេសអ៊ុយក្រែន កាលពីថ្ងៃអង្គារ អ្នកសង្កេតការណ៍បានចោទសួរថា ហេតុអ្វីបានជាប្រទេសរុស្ស៊ី ប្រសិនបើមនុស្សជាច្រើនសង្ស័យថា ខ្លួនទទួលខុសត្រូវ ចំពោះការបំផ្លាញទំនប់នេះ នឹងប្រព្រឹត្តិអំពើ ដែលអាចមានផលប៉ះពាល់យ៉ាងធ្ងន់ធ្ងរដល់គ្រីមៀ។
តើប្រធានាធិបតីរុស្ស៊ីលោក វ្ល៉ាឌីមៀ ពូទីន នឹងបោះបង់ចោលនៅលើឧបទ្វីបនេះ ដែលពីមុនត្រូវបានគេមើលឃើញថា ជាមូលដ្ឋានគ្រឹះនៃមហិច្ឆិតារបស់អធិរាជដែរឬទេ? អ្នកខ្លះ រួមទាំងប្រធានាធិបតីអ៊ុយក្រែន លោក វូឡូឌីមៀ ហ្សេឡិនស្គី បានលើកឡើងថា ប្រហែលជាករណីនេះ ប៉ុន្ដែអ្នកផ្សេងទៀតក៏មិនបានយល់ស្របដូចគ្នាដែរ។
លោក Anders Åslund ជាសេដ្ឋវិទូ និងជាសាស្ត្រាចារ្យរងនៅសកលវិទ្យាល័យ Georgetown បានទាញការប្រៀបធៀបរវាងការបំផ្លិចបំផ្លាញទំនប់ និងរបៀបដែលប្រធានាធិបតីអ៊ីរ៉ាក់លោក Saddam Hussein បានលុបអណ្ដូងប្រេងក្នុងឆ្នាំ១៩៩១ នៅពេលដែលលោក ត្រូវបានបណ្តេញចេញពីប្រទេសគុយវ៉ែត។
លោក Åslund ដែលធ្លាប់ធ្វើជាទីប្រឹក្សាសេដ្ឋកិច្ចរបស់រដ្ឋាភិបាលរុស្ស៊ី និងអ៊ុយក្រែន បានប្រាប់កាសែត Newsweek ថា “នៅពេលដែលអ្នកបាត់បង់ទឹកដី នោះអ្នកបំផ្លាញវា ខ្ញុំគិតថានេះជាអ្វីដែលអ្នកធ្វើ នៅពេលអ្នកបោះបង់”។
លោកបានលើកឡើងថា ទំនប់នេះដើរតួយ៉ាងសំខាន់ ក្នុងការទ្រទ្រង់នៅឧបទ្វីបគ្រីមៀ ដោយសារតែអាងស្តុកទឹករបស់របស់ខ្លួន ត្រូវបានភ្ជាប់ទៅនឹងប្រឡាយដ៏សំខាន់មួយ។
លោក Åslund បានលើកឡើងថា “ប្រឡាយនៅភាគខាងជើងឧបទ្វីបគ្រីមៀ ដែលបញ្ជូនទឹក ៨៥ ភាគរយទៅឧបទ្វីបគ្រីមៀ គឺយកទឹកពីអាងស្ដុក Nova Kakhovka ។ បើគ្មានប្រភពទឹកនេះទេ នោះឧបទ្វីបគ្រីមៀ មិនមាននិរន្តរភាពក្នុងរយៈពេលយូរនោះទេ”។
លោក ពូទីន បានឈ្លានពាន និងបញ្ចូលឧបទ្វីបគ្រីមៀពីអ៊ុយក្រែនក្នុងឆ្នាំ២០១៤ បន្ទាប់ពីលោក ហ្សេឡិនស្គី ចាប់ផ្តើមទទួលបានសន្ទុះប្រឆាំងនឹងកងកម្លាំងរុស្ស៊ី ក្នុងសង្រ្គាមដែលលោក ពូទីន បានចាប់ផ្តើមក្នុងខែកុម្ភៈ ឆ្នាំ២០២២ លោកបានចាប់ផ្តើមលើកឡើងថា ឧបទ្វីបគ្រីមៀ គួរតែត្រូវបានទទួលស្គាល់ថា ជាទឹកដីអ៊ុយក្រែន ជាលក្ខខណ្ឌមួយក្នុង ចំណោមលក្ខខណ្ឌរបស់លោក សម្រាប់បទឈប់បាញ់។
ជាមួយគ្នានេះដែរ មន្ត្រីលោក ពូទីន និងវិមានក្រឹមឡាំង បានឲ្យដឹងថា មិនត្រឹមតែតំបន់គ្រីមៀ នឹងនៅតែជាផ្នែកនៃប្រទេសរុស្ស៊ី នៅក្នុងកិច្ចព្រមព្រៀងសន្តិភាពដ៏មានសក្តានុពលណាមួយនោះទេ ប៉ុន្តែទឹកដីអ៊ុយក្រែន ចំនួនបួន ដែលលោក ពូទីន បញ្ចូលដោយខុសច្បាប់នៅក្នុងខែកញ្ញា ឆ្នាំ២០២២ ក៏នឹងធ្វើដូច្នោះដែរ៕
ប្រែសម្រួល ឈូក បូរ៉ា
