បរទេស៖ សហរដ្ឋអាមេរិក ជប៉ុន និងកោះតៃវ៉ាន់ គ្រោងនឹងចាប់ផ្តើមចែករំលែកទិន្នន័យពេលវេលាជាក់ស្តែងពីយន្តហោះគ្មានមនុស្សបើក (UAV) ដែលជាផ្នែកមួយនៃផែនការដើម្បីបង្កើនអន្តរប្រតិបត្តិការនៅក្នុងឥណ្ឌូប៉ាស៊ីហ្វិក។
យោងតាមសារព័ត៌មាន Sputnik ចេញផ្សាយ នៅថ្ងៃទី៨ ខែមិថុនា ឆ្នាំ២០២៣ បានឱ្យដឹងថា ទីក្រុងវ៉ាស៊ីនតោន ត្រូវបានគេរាយការណ៍ថា បានប្តេជ្ញាចិត្តក្នុងការជំរុញការសម្របសម្រួលផ្នែកយោធា រវាងសម្ព័ន្ធមិត្តរបស់ខ្លួនក្រោមលេសថា ប្រសិនបើចិនវាយប្រហារតៃវ៉ាន់ សេណារីយ៉ូបែបនេះនឹងអំពាវនាវឱ្យបង្កើត “រូបភាពប្រតិបត្តិការទូទៅ” ដោយប្រើសមត្ថភាព របស់យន្តហោះគ្មានមនុស្សបើកឈ្លបយកការណ៍។
ប្រភពជាច្រើនត្រូវបានគេលើកឡើងថា យន្តហោះគ្មានមនុស្សបើក MQ-9B SeaGuardian ចំនួន៤គ្រឿង ដែលជាកំណែដែនសមុទ្ររបស់ American Reaper UAV នឹងត្រូវបញ្ជូនទៅកាន់ទីក្រុងតៃប៉ិ ដោយក្រុមហ៊ុន ម៉ៅការការពារជាតិអាមេរិក General Atomic Aeronautical Systems ក្នុងឆ្នាំ ២០២៥ ។ យន្តហោះគ្មានមនុស្សបើក ដែលអាចកំណត់រចនាសម្ព័ន្ធជាមួយ សមត្ថភាពឆ្លងដែនសម្រាប់ការឃ្លាំមើល ដែនសមុទ្រយ៉ាងទូលំទូលាយ ត្រូវបានគេនិយាយថា ទទួលបានជោគជ័យក្នុងការកំណត់ទីតាំង តាមដាន និងកំណត់គោលដៅនាវា និងរ៉ាដារបស់សត្រូវ។
UAVs នៅពេលដែលយន្តហោះនេះទៅដល់កោះតៃវ៉ាន់ នឹងត្រូវបានអនុញ្ញាតឱ្យបញ្ចូល ទៅក្នុងប្រព័ន្ធដែលដាក់ពង្រាយដោយយោធាអាមេរិក និងកងកម្លាំងស្វ័យការពាររបស់ជប៉ុននៅក្នុងតំបន់។ ហេតុនេះ ព័ត៌មានស៊ើបការណ៍ ដែលប្រមូលបានក្នុងពេលដំណាលគ្នា ដោយយន្តហោះគ្មានមនុស្សបើក គឺនឹងមានសម្រាប់ដៃគូទាំងអស់នៅក្នុងប្រព័ន្ធ ។
របាយការណ៍បានបន្ថែមថា បន្ទាប់មកយោធារបស់កោះតៃវ៉ាន់នឹងត្រូវបានបង្រៀនពីរបៀបដំណើរ ការប្រព័ន្ធយន្តហោះគ្មានមនុស្សបើកថ្មី ដោយភ្ជាប់ជាមួយសមភាគីអាមេរិក និងជប៉ុន៕
