ហ្វ្រែងហ្វឺត៖ សមយុទ្ធទ្រង់ទ្រាយធំរបស់អង្គការណាតូ ដែលបានចាប់ផ្ដើមកាលពីថ្ងៃចន្ទ គ្រោងនឹងបង្កការរំខាន ដ៏ធំដល់ជើងហោះហើរ ដឹកអ្នកដំណើរក្នុងប្រទេសអាល្លឺម៉ង់ ដោយបង្កើនការព្រួយបារម្ភ ពីអ្នកដំណើរតាមផ្លូវអាកាស និងអ្នកតវ៉ាផងដែរ។
លោក Jens Bischof ប្រធានក្រុមហ៊ុនអាកាសចរណ៍តម្លៃទាប Eurowings របស់ក្រុមហ៊ុន Lufthansa Group បានឲ្យដឹងថា លោកមានការព្រួយបារម្ភ អំពីការដួលរលំនៃសមយុទ្ធ ដែលបាននាំឱ្យមានការបិទ និងការរឹតបន្តឹងយ៉ាងខ្លាំង នៃដែនអាកាសអាល្លឺម៉ង់ដ៏ធំមួយ។
សមយុទ្ធយោធានេះ ត្រូវបានគេស្គាល់ថាជា “Air Defender 23” គឺជាសមយុទ្ធដាក់ពង្រាយទ័ពអាកាស ដ៏ធំបំផុតមិនធ្លាប់មានរបស់ណាតូ ដែលមានបុគ្គលិកយោធា ១០០០០នាក់ និងយន្តហោះប្រយុទ្ធចំនួន ២៥០គ្រឿងមកពី ២៥ ប្រទេសរួមទាំងសហរដ្ឋអាមេរិកផងដែរ។ វានឹងមានរយៈពេលរហូតដល់ថ្ងៃទី២៣ ខែមិថុនា។
សមយុទ្ធរយៈពេលពីរសប្តាហ៍នឹងត្រូវបានអនុវត្តជាចម្បង នៅក្នុងដែនអាកាសអាល្លឺម៉ង់។ ផលប៉ះពាល់ជាលទ្ធផលរួមមានការ ពន្យារពេលជើងហោះហើរ ដែលអាចកើតមាន ពេលវេលាហោះហើរយូរ និងការលុបចោលនៅពេលមមាញឹក។
ជើងហោះហើររហូតដល់ ៨០០ជើង នឹងត្រូវប្តូរទិស ហើយប្រហែល ៤០ ភាគរយនឹងត្រូវហោះហើរបានយូរជាងនេះ ១១០ គីឡូម៉ែត្រ នេះបើយោងតាមការប៉ាន់ស្មាន របស់អង្គការអឺរ៉ុប សម្រាប់សុវត្ថិភាពនៃការធ្វើនាវាចរណ៍ផ្លូវអាកាស (Eurocontrol)។
អាកាសយានដ្ឋាន Hamburg បានប្រាប់ប្រព័ន្ធផ្សព្វផ្សាយ ក្នុងស្រុកថា វាមិនអាចទៅរួចទេក្នុងការដឹងច្បាស់ថា ជើងហោះហើរនីមួយៗនឹងត្រូវប៉ះពាល់នោះទេ ដោយសារតែលក្ខណៈ ដែលមិនធ្លាប់មានពីមុនមកនៃសមយុទ្ធ ដែលកំពុងបន្ត។ អាកាសយានដ្ឋាន Stuttgart ក៏បានបង្ហោះសារស្រដៀងគ្នានេះ នៅលើប្រព័ន្ធផ្សព្វផ្សាយសង្គមផងដែរ។ ក្រុមហ៊ុនទាំងពីរបានស្នើអ្នកដំណើរឱ្យ តាមដានស្ថានភាពជើងហោះហើរ របស់ពួកគេឱ្យបានដិតដល់។
បាតុករប្រមាណ ៣០០នាក់ បានប្រមូលផ្តុំគ្នានៅមុខមូលដ្ឋានទ័ពអាកាសក្នុងរដ្ឋ Lower Saxony កាលពីថ្ងៃសៅរ៍ ជុំវិញការខូចខាតអាកាសធាតុដោយយន្តហោះ និងជុំវិញការបង្ហាញកម្លាំងយោធា របស់អង្គការណាតូ នៅពេលដែលជម្លោះក្នុងប្រទេសអ៊ុយក្រែន កំពុងផ្ទុះឡើង ៕
ប្រែសម្រួល ឈូក បូរ៉ា
