បាងកក៖ ទិន្នន័យបានបង្ហាញឲ្យដឹងថា ការនាំចេញរថយន្តរបស់ប្រទេសថៃ បានបន្តកើនឡើងក្នុងខែឧសភា ដោយសារមូលដ្ឋានប្រៀបធៀប ទាបកាលពីឆ្នាំមុន និងការនាំចេញកាន់តែខ្ពស់ ទៅកាន់ទីផ្សារបរទេសភាគច្រើន។
យោងតាមសហព័ន្ធឧស្សាហកម្មថៃ (FTI) បានឱ្យដឹងថា ការនាំចេញរថយន្តបានបញ្ចប់ របស់ប្រទេសបានកើនឡើង ១២,២៥ភាគរយ ធៀបនឹងឆ្នាំមុនកាលពីខែមុនដល់ ៨៦,៣៥៨គ្រឿង បន្ទាប់ពីការកើនឡើងចំនួន ៤៣,៥៣ភាគរយ ពីមួយឆ្នាំទៅមួយឆ្នាំនៅក្នុងខែមេសា។
ក្រុមហ៊ុនផលិតរថយន្ត បានផលិតរថយន្តចំនួន ១៥០,៥៣២គ្រឿង ក្នុងប្រទេសកាលពីខែមុន កើនឡើង ១៦,៤៨ភាគរយធៀបនឹងឆ្នាំមុន ដោយសារតែផលិតកម្មកើនឡើង សម្រាប់ការនាំចេញ និងការលក់ក្នុងស្រុក នេះបើយោងតាម Surapong Paisitpattanapong ដែលជាអនុប្រធានក្លឹបឧស្សាហកម្មរថយន្ត FTI និងជាអ្នកនាំពាក្យ។
លោក Surapong បានប្រាប់សន្និសីទសារព័ត៌មានមួយថា ក្នុងរយៈពេល ៥ខែដំបូងនៃឆ្នាំនេះ ការផលិតរថយន្តបានកើនឡើង ៦,៧២ ភាគរយធៀបនឹងឆ្នាំមុនដល់ ៧៧៥,៩៥៥គ្រឿង ដែលបង្ហាញថាគោលដៅផលិតកម្ម រថយន្តដែលរំពឹងទុកនៅចុងឆ្នាំ ១,៩៥លានគ្រឿង គឺអាចសម្រេចបាន។
ការលក់រថយន្តក្នុងស្រុកបានកើនឡើង ០,៥៥ ភាគរយធៀបនឹងឆ្នាំមុនកាលពីខែមុនដល់ ៦៥,០៨៨គ្រឿង បន្ទាប់ពីការធ្លាក់ចុះ ៦,១៤ ភាគរយនៅក្នុងខែមេសា នេះបើយោងតាមលោក Surapong ៕
ប្រែសម្រួល ឈូក បូរ៉ា
