ប៉េកាំង៖ អ្នកនាំពាក្យ របស់ចិន បានឲ្យដឹងថា ប្រទេសចិន ជំរុញឱ្យសហរដ្ឋអាមេរិក បញ្ឈប់ការបញ្ចេញមតិ ដែលមិនទទួលខុសត្រូវ និងគោរពការប្តេជ្ញាចិត្ត របស់ខ្លួនជាមួយ នឹងសកម្មភាពជាក់ស្តែង។
លោក Mao Ning អ្នកនាំពាក្យក្រសួងការបរទេស បានធ្វើការលើកឡើងនេះ ជាការឆ្លើយតបនឹងរបាយការណ៍ របស់ប្រព័ន្ធផ្សព្វផ្សាយ ។ យោងតាមរបាយការណ៍ រដ្ឋមន្ត្រីការបរទេសអាមេរិក លោក Antony Blinken បាននិយាយនៅក្នុង បទសម្ភាសន៍នាពេលថ្មីៗនេះថា វាមិនមែនជារឿង សម្ងាត់ទេ ដែលមានភាពខុសប្លែកគ្នា រវាងសហរដ្ឋអាមេរិក និងចិន ។ សហរដ្ឋអាមេរិកនឹងបន្តឈរជើង ដើម្បីផលប្រយោជន៍របស់ខ្លួន ក្រោកឈរឡើងសម្រាប់តម្លៃរបស់ខ្លួន ហើយបន្តធ្វើអ្វីៗ និងនិយាយអ្វីដែលចិនមិនចូលចិត្ត ។
លោកស្រីបានលើកឡើងថា ប្រទេសចិន មិនពេញចិត្តនឹងការលើកឡើង របស់រដ្ឋមន្រ្តីការបរទេសអាមេរិកលោក Blinken នោះទេ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ ។
លោកស្រីបានបន្ដថា សហរដ្ឋអាមេរិក បន្តអនុវត្តគោលនយោបាយចិន ខុសឆ្គង ដែលផ្តើមចេញពីការយល់ឃើញខុសឆ្គងលើចិន ស្វែងរកការទប់ស្កាត់ និងគាបសង្កត់ប្រទេសចិន ហើយបាននិងកំពុងវាយប្រហារ និងលាបពណ៌មុខរបស់ចិន ដើម្បីជ្រៀតជ្រែកកិច្ចការផ្ទៃក្នុងរបស់ប្រទេសចិន។
អ្វីដែលសហរដ្ឋអាមេរិកបាននិយាយ និងបានប្រព្រឹត្តរំលោភលើបទដ្ឋានមូលដ្ឋាន ដែលគ្រប់គ្រងទំនាក់ទំនងអន្តរជាតិ។ អ្នកនាំពាក្យរូបនេះបានបន្ដថា ប្រទេសចិន មានហេតុផលគ្រប់យ៉ាង ដើម្បីប្រឆាំងយ៉ាងម៉ឺងម៉ាត់។
លោកស្រីបានបញ្ជាក់ថា “ខ្ញុំចង់បញ្ជាក់ម្តងទៀតថា ការគោរពគ្នាទៅវិញទៅមក គឺជាគោលការណ៍ ជាមូលដ្ឋាន សម្រាប់ប្រទេស ដែលកំពុងដោះស្រាយគ្នា ទៅវិញទៅមក និងជាធាតុផ្សំដ៏សំខាន់ សម្រាប់ប្រទេសចិន និងអាមេរិក ក្នុងការស្វែងរកវិធីត្រឹមត្រូវ ក្នុងការចុះសម្រុងគ្នា” ដោយបន្ថែមថា ប្រទេសចិន ជំរុញឱ្យសហរដ្ឋអាមេរិកបញ្ឈប់ បញ្ចេញមតិដោយមិនទទួលខុសត្រូវ និងគោរពការប្តេជ្ញាចិត្តរបស់ខ្លួន ជាមួយនឹងសកម្មភាពជាក់ស្តែង៕
ប្រែសម្រួល ឈូក បូរ៉ា
