បរទេស ៖ មេដឹកនាំរងនៃគណបក្ស United Nation បាននិយាយនៅថ្ងៃអាទិត្យថា អ្នកគាំទ្រគណបក្ស Move Forward មិនគួរធ្វើបាតុកម្មនៅខាងក្រៅសភា ដើម្បីដាក់សម្ពាធសមាជិកសភា នៅពេលដែលបោះឆ្នោតជ្រើសរើស ប្រធានសភា បន្ទាប់នៅថ្ងៃអង្គារនោះទេ។
យោងតាមសារព័ត៌មាន The Nation ចេញផ្សាយនៅថ្ងៃទី២ ខែកក្កដា ឆ្នាំ២០២៣ បានឱ្យដឹងថា លោក Thanakorn Wangboonkongchana ដែលជារដ្ឋមន្ត្រីការិយាល័យនាយករដ្ឋមន្រ្តីដែលផុតអាណត្តិ បានឆ្លើយតបទៅនឹងការរំពឹងទុកយ៉ាងទូលំទូលាយថា អ្នកគាំទ្រគណបក្ស Move Forward នឹងប្រមូលផ្តុំគ្នានៅខាងក្រៅសភា ដើម្បីគាំទ្រលើការប៉ុនប៉ងរបស់គណបក្ស របស់ពួកគេក្នុងការឡើង កាន់តំណែងប្រធានសភា។
គណបក្ស Move Forward បានឈ្នះអាសនៈច្រើនជាងគេនៅក្នុងសភាតំណាងរាស្រ្ត ក្នុងការបោះឆ្នោតកាលពីថ្ងៃទី១៤ ខែឧសភា រួមទាំងមណ្ឌលចំនួន ៣២ នៃមណ្ឌលបោះឆ្នោតចំនួន ៣៣ របស់ទីក្រុងបាងកក។
ទោះបីជាយ៉ាងណាក៏ដោយ វាមានការចរចាជាយូរជាមួយដៃគូសម្ព័ន្ធ សំខាន់របស់ខ្លួនគឺ គណបក្ស ភឿថៃ អំពីថាតើគណបក្សមួយណា គួរទទួលបានតំណែងប្រធានសភា ហើយការពិភាក្សានេះជារឿយៗ បណ្តាលឱ្យមានការឈ្លោះប្រកែកគ្នា ជាសាធារណៈរវាងសមាជិកមួយចំនួន និងអ្នកគាំទ្រនៃគណបក្សទាំងពីរ ។
លោក Thanakorn បាននិយាយថា ទោះបីជាប្រជាជនមានសិទ្ធិធ្វើបាតុកម្មដោយសន្តិវិធីដោយគ្មាន អាវុធក៏ដោយ ក៏អ្នកគាំទ្រគណបក្ស Move Forward គួរតែរង់ចាំដោយអត់ធ្មត់ ដើម្បីឱ្យសមាជិកសភាធ្វើការងាររបស់ពួកគេនៅក្នុងសភា ជំនួសឱ្យការតវ៉ានៅខាងក្រៅសភា៕
ប្រែសម្រួលៈ ណៃ តុលា
