យេរ៉ូសាឡឹម៖ ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី៥ ខែកក្កដា ឆ្នាំ២០២៣ថា កងទ័ពអ៊ីស្រាអ៊ែល បានឲ្យដឹងនៅក្នុងសេចក្តីថ្លែងការណ៍មួយថា នៅព្រឹកថ្ងៃពុធនេះ ក្រុមសកម្មប្រយុទ្ធនៅតំបន់ហ្គាហ្សាស្ទ្រីប បានបាញ់រ៉ុក្កែតចំនួន៥គ្រាប់ ចូលទៅក្នុងទឹកដីស្ថិតនៅភាគខាងត្បូង នៃប្រទេសអ៊ីស្រាអ៊ែល ហើយត្រូវបានស្ទាក់ចាប់ដោយប្រព័ន្ធការពារដែនអាកាស Iron Dome របស់អ៊ីស្រាអ៊ែល ។
គ្រាប់រ៉ុក្កែតបានបង្កសំឡេងស៊ីរ៉ែននៅក្នុងទីក្រុង Sderot ដែលស្ថិតនៅជាប់ព្រំដែនហ្គាហ្សា និងនៅក្នុងតំបន់ជុំវិញ នៃតំបន់ឆ្នេរសមុទ្រ នៃប្រទេសប៉ាឡេស្ទីន ។
ខ្សែវីដេអូនៅលើបណ្ដាញសង្គមបានបង្ហាញអ្នកស្រុករត់រកទីជម្រក ។ មិនទាន់មានរបាយការណ៍ភ្លាមៗ អំពីអ្នករងរបួសឬការខូចខាតអ្វីនោះទេ ។
យោធាអ៊ីស្រាអ៊ែល បានបញ្ជាក់នៅក្នុងសេចក្តីថ្លែងការណ៍ថា ការបាញ់បង្ហោះចំនួន៥គ្រាបពីនេះ គឺចេញពីតំបន់ហ្គាហ្សាស្ទ្រីបត្រូវបានកំណត់អត្តសញ្ញាណ និងបានបញ្ជាក់ទៀតថា “ប្រព័ន្ធការពារដែនអាកាសបានស្ទាក់ចាប់ បានធ្វើការបាញ់ទៅលើគ្រាប់រ៉ុក្កែតទាំងអស់នោះទម្លាក់កម្ទេចចោលដោយទទួលបានជោគជ័យ” ៕ ប្រែសម្រួលដោយ៖ ម៉ៅ បុប្ផាមករា
