បរទេស៖ នាយករដ្ឋមន្ត្រីជប៉ុន លោក Fumio Kishida នឹងចូលរួមជាមួយមេដឹកនាំណាតូ ផ្សេងទៀត ក្នុងប្រទេសលីទុយអានី នៅថ្ងៃអង្គារនេះ ដើម្បីរំលឹកសម្ព័ន្ធភាពនេះដែលកំពុងផ្តោតលើអ៊ុយក្រែន ដើម្បីឱ្យយកចិត្តទុកដាក់ចំពោះសកម្មភាពរបស់ចិន និងរុស្ស៊ី នៅក្នុងតំបន់អាស៊ី ដែលជប៉ុនមើលឃើញថា ជាការគំរាមកំហែងដល់សន្តិសុខពិភពលោក។
យោងតាមសារព័ត៌មាន Japan Today ចេញផ្សាយនៅថ្ងៃទី៨ ខែកក្កដា ឆ្នាំ២០២៣ បានឱ្យដឹងថា ដំណើរទស្សនកិច្ចលើកទីពីររបស់លោក Kishida ទៅកាន់ការជួបជុំរបស់អង្គការសន្ធិសញ្ញាអាត្លង់ទិកខាងជើង រួមជាមួយនឹងមេដឹកនាំកូរ៉េខាងត្បូង អូស្ត្រាលី និងនូវែលសេឡង់ បានកើតឡើងនៅពេលដែលប្រទេសជប៉ុន បង្កើនការចំណាយលើវិស័យការពារជាតិរបស់ខ្លួនទ្វេដង ដើម្បីរារាំងកងកម្លាំងចិន និងរុស្ស៊ី នៅក្នុងដែនទឹក និងអាកាស ជុំវិញប្រទេសជប៉ុន។
ដោយមានអារម្មណ៍ថា ជប៉ុន មិនអាចពឹងផ្អែកតែលើសម្ព័ន្ធមិត្តចាស់របស់ខ្លួនគឺសហរដ្ឋអាមេរិក ក្នុងការគាំទ្រខ្លួន បានទៀត លោក Kishida ក៏កំពុងទាក់ទងនឹងដៃគូសន្តិសុខថ្មីៗទៀត។
លោក Michito Tsuruoka អ្នកជំនាញ នៃអង្គការណាតូនៅសាកលវិទ្យាល័យ Keio បាននិយាយថា “ប្រទេសជប៉ុន និយាយអំពីគោលការណ៍ដូចជាបូរណភាពទឹកដី ប៉ុន្តែសារទៅកាន់អឺរ៉ុប គឺ “កុំភ្លេចអំពីឥណ្ឌូប៉ាស៊ីហ្វិក មិនថា ស្ថានភាពជាមួយរុស្ស៊ី លំបាកប៉ុណ្ណានោះទេ»៕ ប្រែសម្រួលៈ ណៃ តុលា
