អង់ការ៉ា ៖ អគ្គលេខាធិការអង្គការណាតូ លោក Jens Stoltenberg បានប្រកាសថា រដ្ឋាភិបាលតួកគី បានយល់ព្រមជំរុញ ការចូលជា សមាជិក របស់ប្រទេសស៊ុយអែត ទៅក្នុងអង្គការសន្ធិសញ្ញាអាត្លង់ទិក ខាងជើង (ណាតូ) នៅថ្ងៃចន្ទ មួយថ្ងៃមុនកិច្ចប្រជុំកំពូលរបស់ សម្ព័ន្ធភាពក្នុងរដ្ឋធានីលីទុយអានី ។
លោក Stoltenberg បានឲ្យដឹងនៅក្នុងសន្និសីទសារព័ត៌មានមួយ បន្ទាប់ពីកិច្ចប្រជុំ ត្រីភាគីជាមួយប្រធានាធិបតីតួកគី លោកRecep Tayyip Erdogan និងនាយករដ្ឋមន្ត្រី ស៊ុយអែត លោក Ulf Kristersson ថា តួកគី បានយល់ ព្រមបញ្ជូនពិធីសារ ចូលជាសមាជិក របស់ប្រទេសស៊ុយអែត ទៅសភាឱ្យបានឆាប់ តាមដែលអាចធ្វើទៅបាន និងធានាបាននូវការផ្តល់ សច្ចាប័នរបស់ខ្លួន ។
ដំណើរការចូលជា សមាជិកណាតូ ទាមទារការយល់ព្រមពីរដ្ឋ ជាសមាជិកទាំងអស់ ។ ប្រទេសស៊ុយអែត និងហ្វាំងឡង់ បានដាក់ពាក្យ ចូលរួមសម្ព័ន្ធភាព កាលពីឆ្នាំមុន ប៉ុន្តែបានប្រឈមមុខនឹងការជំទាស់ ពីទីក្រុងអង់ការ៉ា ដែលបានប្រកែកថា ប្រទេសទាំងពីរកំពុងកាន់កាប់សមាជិក នៃគណបក្សពលករឃឺដ (PKK) និងចលនា Gulen ។
ក្រោយមកតួកគីបានដកការ ជំទាស់របស់ខ្លួន ចំពោះការចូលជាសមាជិកណាតូ របស់ហ្វាំងឡង់ នៅដើមឆ្នាំនេះ បន្ទាប់ពីទីក្រុងហេលស៊ីនគី បានចាត់វិធានការ ជាក់ស្តែង ប្រឆាំងនឹងអង្គការបែបនេះ ។ នៅខែមេសា ហ្វាំងឡង់ បានក្លាយជារដ្ឋសមាជិកទី៣១ របស់ណាតូ ហើយទោះជាយ៉ាង ណាក៏ដោយ ទីក្រុងអង់ការ៉ា បានបន្តរារាំងការដេញថ្លៃ របស់អង្គការណាតូរបស់ស៊ុយអែត។
ប្រធានអង្គការណាតូរូបនេះ បានលើកឡើងថា ចាប់តាំងពីកិច្ចប្រជុំកំពូល របស់អង្គការណាតូ ឆ្នាំ២០២២ ស៊ុយអែត និងតួកគី បានធ្វើការយ៉ាងជិតស្និទ្ធ ជាមួយគ្នា ដើម្បីដោះស្រាយបញ្ហាសន្តិសុខ ស្របច្បាប់របស់តួកគី។
លោកបានបន្ដថា “ស៊ុយអែត បានធ្វើវិសោធនកម្មរដ្ឋធម្មនុញ្ញ របស់ខ្លួន ផ្លាស់ប្តូរច្បាប់របស់ខ្លួន ពង្រីកកិច្ចសហប្រតិបត្តិការ ប្រឆាំងភេរវកម្មយ៉ាងសំខាន់ ប្រឆាំងនឹង PKK និងបន្តការនាំចេញអាវុធ ទៅកាន់ប្រទេសតួកគី គ្រប់ជំហានទាំងអស់ ដែលមានចែងក្នុងអនុស្សរណៈត្រីភាគី បានព្រមព្រៀងគ្នាក្នុងឆ្នាំ២០២២” ។
លោកបានបន្ថែមថា ប្រទេសទាំងពីរបានព្រមព្រៀង បន្តកិច្ចសហប្រតិបត្តិការ ក្រោមយន្តការរួមអចិន្ត្រៃយ៍ត្រីភាគី ក្នុងក្របខ័ណ្ឌនៃអនុស្សរណៈត្រីភាគី និងក្រោម “ការបង្រួមសន្តិសុខទ្វេភាគី ថ្មីដែលនឹងជួបប្រជុំប្រចាំឆ្នាំ នៅថ្នាក់រដ្ឋមន្ត្រី និងបង្កើតក្រុមការងារ តាមការសមស្រប”៕
ប្រែសម្រួល ឈូក បូរ៉ា
