ប៉េកាំង៖ មន្ត្រីការទូតជាន់ខ្ពស់ចិន លោក វ៉ាង យី បានឲ្យដឹងថា សហរដ្ឋអាមេរិក គួរតែចាត់វិធានការជាក់ស្តែង ដើម្បីនាំយកទំនាក់ទំនងចិន-អាមេរិកត្រឡប់ទៅរកផ្លូវត្រូវវិញ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
នៅពេលជួបជាមួយរដ្ឋមន្ត្រីការបរទេសអាមេរិក លោក Antony Blinken នៅខាងក្រៅកិច្ចប្រជុំរដ្ឋមន្ត្រីការបរទេសអាស៊ាន ជាបន្តបន្ទាប់ លោក វ៉ាង យី ប្រធានការិយាល័យគណៈកម្មាធិការកណ្តាល សម្រាប់កិច្ចការបរទេស បានឲ្យដឹងថា ភាគីទាំងពីរ បានឈានដល់ការឯកភាពគ្នាតាមរយៈការទំនាក់ទំនងស៊ីជម្រៅ និងស្មោះត្រង់ ក្នុងដំណើរទស្សនកិច្ចរបស់លោក Blinken នៅប្រទេសចិន កាលពីខែមុន។
លោកបន្ដថា ការឯកភាពដ៏សំខាន់បំផុតគឺការវិលត្រឡប់ទៅកាន់របៀបវារៈ ដែលកំណត់ដោយប្រមុខរដ្ឋទាំងពីរ នៅកោះបាលី ប្រទេសឥណ្ឌូនេស៊ី និងបោះជំហានសំខាន់ឆ្ពោះទៅរកការកំណត់ផ្លូវត្រឹមត្រូវនៃទំនាក់ទំនងរវាងកប៉ាល់យក្សចិន-អាមេរិក។
លោក វ៉ាង យី បានបន្ដថា ភាគីអាមេរិក គួរតែគិតគូរអំពីបញ្ហា ដែលនាំឲ្យមានការលំបាកដល់ទំនាក់ទំនងចិន-អាមេរិក បង្វែរការយល់ស្រប ដែលសម្រេចបានរវាងប្រធានាធិបតីចិន និងសហរដ្ឋអាមេរិក នៅឯកិច្ចប្រជុំកោះបាលីរបស់ពួកគេទៅជាសកម្មភាពជាក់ស្តែង និងធ្វើឱ្យបានល្អលើការសន្យា ដែលធ្វើឡើងដោយប្រធានាធិបតីសហរដ្ឋអាមេរិកលោក ចូ បៃដិន។
លោកបានកត់សម្គាល់ថា សកម្មភាពជាក់ស្តែង គឺចាំបាច់ ដើម្បីដកចេញនូវឧបសគ្គទាំងការរំពឹងទុក និងមិនបានរំពឹងទុក ដើម្បីប្រមូលសន្ទុះសម្រាប់ស្ថិរភាព ទំនាក់ទំនងចិន-អាមេរិក នេះបើយោងតាមការចចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោកបានអំពាវនាវឱ្យសហរដ្ឋអាមេរិក ប្រកាន់យកអាកប្បកិរិយាសមហេតុផល និងជាក់ស្តែង ហើយធ្វើការជាមួយប្រទេសចិន ក្នុងទិសដៅដូចគ្នា ដើម្បីជំរុញការពិគ្រោះយោបល់លើគោលការណ៍ណែនាំ សម្រាប់ទំនាក់ទំនងចិន-អាមេរិក ពង្រីកបណ្តាញទំនាក់ទំនងការទូត និងសន្តិសុខ ធ្វើឲ្យប្រសើរឡើងនូវប្រសិទ្ធភាពនៃការទំនាក់ទំនង និងសម្រួលដល់ការផ្លាស់ប្តូរប្រជាជននិងប្រជាជន។
លោក បានពន្យល់យ៉ាងលម្អិតអំពីជំហរដ៏ឧឡារិករបស់ចិន ចំពោះសំណួរតៃវ៉ាន់ ដោយទាមទារឱ្យសហរដ្ឋអាមេរិក ឈប់ជ្រៀតជ្រែកចូលកិច្ចការផ្ទៃក្នុងរបស់ចិនដោយចេតនា ឬធ្វើឱ្យប៉ះពាល់ដល់អធិបតេយ្យភាព និងបូរណភាពទឹកដីរបស់ចិន បញ្ឈប់ការគាបសង្កត់សេដ្ឋកិច្ច ពាណិជ្ជកម្ម វិទ្យាសាស្ត្រ និងបច្ចេកវិទ្យារបស់ចិន ហើយលើកយកអំពើខុសច្បាប់របស់ខ្លួន និងទណ្ឌកម្មមិនសមហេតុផលប្រឆាំងនឹងចិន។
លោកបន្ថែមថា ក្នុងនាមជាប្រទេសធំៗ ដែលមានឥទ្ធិពលសំខាន់ ប្រទេសចិន និងសហរដ្ឋអាមេរិក គួរតែគោរពកិច្ចខិតខំប្រឹងប្រែងរបស់ប្រទេសក្នុងតំបន់ គាំទ្រភាពជាកណ្តាលរបស់អាស៊ាន និងជៀសវាងការបង្កជម្លោះ និងកត្តាស្មុគស្មាញក្នុងកិច្ចសហប្រតិបត្តិការក្នុងតំបន់។
ភាគីទាំងពីរក៏បានស្វែងរកយ៉ាងសកម្មនូវមធ្យោបាយអនុវត្តការពិគ្រោះយោបល់លើបញ្ហាអាស៊ីប៉ាស៊ីហ្វិក និងកិច្ចការដែនសមុទ្រ។ ពួកគេបានចាត់ទុកការជួបគ្នានេះថា ជាការពិតប្រាកដប្រជាមានប្រសិទ្ធភាព និងក្នុងការស្ថាបនា ហើយបានយល់ព្រមរក្សាទំនាក់ទំនងជាមួយគ្នាទៅវិញទៅមក៕
ប្រែសម្រួល ឈូក បូរ៉ា
