បរទេស៖ ប៉ូលិសរប់សប្រទេសថៃ បានដាក់ការចោទប្រកាន់ឃាតកម្មគិតទុកជាមុន ប្រឆាំងនឹងជនសង្ស័យសំខាន់ក្នុងករណីឃាតកម្មលើឈ្មួញកណ្តាលអចលនទ្រព្យជនជាតិអាល្លឺម៉ង់មួយរូប ដោយកាត់សាកសពជាកង់ ញាត់ចូលធុងទឹកកក នៅខេត្តឈុនបុរី។
យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី១៥ ខែកក្កដា ឆ្នាំ២០២៣ បានឱ្យដឹងថា អគ្គស្នងការរងនគរបាលជាតិថៃ លោកឧត្តមសេនីយ៍ Surachate Hakparn បាននិយាយកាលពីថ្ងៃសុក្រថា ជនជាតិអាល្លឺម៉ង់ ឈ្មោះ Olaf Thorsten Brinkmann អាយុ ៥២ ឆ្នាំ គឺជាជនសង្ស័យសំខាន់ក្នុងចំណោមមនុស្ស ៤ នាក់ដែលត្រូវបានចាប់ខ្លួនពីបទជាប់ពាក់ព័ន្ធក្នុងឃាតកម្មលើជនរងគ្រោះឈ្មោះ Hans Peter Walter Mack អាយុ ៦២ ឆ្នាំ។
លោកថា ប៉ូលិសបានផ្លាស់ប្តូរការចោទប្រកាន់ពីបទល្មើសលើកមុន គឺបទឃាតកម្ម ដែលមានទោសដាក់ពន្ធនាគារអស់មួយជីវិត ដោយលោក Brinkmann ឥឡូវនេះត្រូវបានចោទប្រកាន់ពីបទឃាតកម្មគិតទុកជាមុន ដែលត្រូវផ្តន្ទាទោសប្រហារជីវិត។
ជនសង្ស័យបីនាក់ទៀតមាន ឈ្មោះ Petra Christl Grundgreif អាយុ ៥៤ឆ្នាំ, Nicole Frevel អាយុ ៥២ ឆ្នាំ និង ឈ្មោះ Shahrukh Karim Uddin អាយុ ២៧ ឆ្នាំ។
លោកឧត្តមសេនីយ៍ Surachate បាននិយាយថា ប៉ូលីសក៏បានរឹបអូសទូកល្បឿនលឿន ដែលជាកម្មសិទ្ធិរបស់លោក Brinkmann ហើយបានរកឃើញថា ជនសង្ស័យរូបនេះគ្រោងនឹងទម្លាក់សាកសពរបស់ Mack ចូលទៅក្នុងសមុទ្រ។ ប៉ូលីសក៏ទទួលបានវីដេអូ CCTV ដែលបង្ហាញពីលោក Brinkmann និងលោក Uddin នៅក្នុងហាងលក់ឧបករណ៍នេសាទមួយ។
ម្ចាស់ម៉ាស៊ីនរណារយន្ត ឬម៉ាស៊ីនអារឈើ ក៏បានផ្តល់សក្ខីកម្មថា គាត់បានលក់រណារយន្តនេះទៅឲ្យជនបរទេសពីរនាក់ដែលគេប្រើសម្រាប់កាប់សព Mack ជាបំណែកៗ៕ ប្រែសម្រួលៈ ណៃ តុលា
